Urriko alearen azalean, kurtso hasierako ekitaldiaren amaiera laburbiltzen dauan irudia ikusi daiteke. Askotariko eleiz eremutatik joandako zortzi lagun alkartu ziran egitasmoaren logoaren parean, kurtso honetako kartelari bizia emonez. Argazkian, bertaratutako guztiek giza katea egin eta danek batera ‘Gure Aita’ abestu eben unea jasoten da.
Aldizkarian jasotako beste hainbat gai
Aldizkariaren 32 orrialde asko eta asko ‘Goazen!’ ekitaldiarentzat bada be -ikus-entzunezkoek osatzen dabe informazinoa-, beste hainbat gai be jorratzen da agerkarian. Esate baterako, Caritas Bizkaia erakundeak kudeatzen dauan ‘Egunon Etxea’ zentroaren 30. urteurrena, Bidesari alkarteak gaixotasun larriak dabezan presoentzat martxan jarri dauan egitarau aitzindaria edo urriaren 28an San Viatorren (Sopuerta) egingo dan parrokietako erreferenteen lehenengo batzarra.
Ez dira falta ohiko laguntzaileen artikuluak, hain zuzen be, artxibotik, museotik, liturgiarako ordezkaritzatik edo Eleizbarrutiko liburutegitik jasotakoak.
