Bikario Nagusia aurretik ezarritako epe jakin baterako aukeratzen ez bada be, Bilboko gotzainak, Sinodo-senean oinarrituz, kargu honen inguruko azterraldia egitea erabaki dau.
Gotzainak alkartearei zuzendutako gutunean azaldu dauanez, neurri honek Sinodoko Azken Agirian jasotako jarraibidea kintuan hartu dau: “Sinodoko Azken Agirian (DF80) esaten dana, hau da “gardentasun, kontu-emote eta ebaluazino kultura nork bere egin”, kontuan hartuta, Bikario Nagusiaren inguruko azterraldia be egingo da. Izan be, Bikario Nagusiaren agintaldia amaitu ez bada be, sinodo-oinarri hau nire ustez egokiena da pastoral gobernurako eta, horregaitik, kargu hau azterraldian sartzeko erabakia hartu dot”.
Era berean, zera adierazo dau: “Nire esker onik beroena adierazo gura deutset jardunean dagozan eta hautagai di-ran bikarioei egiten diharduen lanagaitik eta eskeini deusten egundoko laguntzagaitik”. Bost urterako aukeratu ebezan Lurralde Bikarioak eta amaitzear da euren arduraldia; dana dala, orain be proposatu eta aukeratu daitekez.
Azterraldia aldi bitan
Hauxe da azterraldirako egutegia:
1.ALDIA: Hautagaien lehen aukeraketa
2025eko abenduak 1: Lehenengo aldirako lagungarrien bialketa.
2026ko urtarrilak 22: Erantzunak jasotzeko azken eguna (14:00ak arte)
2026ko urtarrilak 23: Zenbaketa eta emaitzak Gotzainari aurkeztea.
Neurritasun-puntuaketaren bidez, Bikario Nagusi izateko boto gehien jaso daben hiru izenen eta lurralde bakotxean Lurralde Bikario izateko hiru izenen lehen aukeraketa egitea da lehenengo aldi honen helburua.
2. ALDIA: Behin betiko proposamena
2026ko otsaiak 16: Bigarren aldirako lagungarriak bialdu.
2026ko martxoak 23: Erantzunak jasotzeko azken eguna (12:00ak arte).
2026ko martxoak 23: Zenbaketa eta emaitzak Gotzainari aurkeztea.
Bigarren aldi honetan, partaideek Bikario Nagusi izateko egokientzat jotako abade baten izena eta bakotxari dagokion lurraldeko Lurralde Bikario izateko egokientzat jotako abade baten izena aukeratuko dabe lehenengo aldian osotutako zerrenda orientagarrietatik; dana dala, honeetan agertzen dez diran hautagaiei botoa emoteko aukera dago,
Gotzainaren bereizketaren ostean, azken erabakiaren barri emongo da.
2026ko irailaren 1ean jabetuko dira kargu barriez.
Araututako parte-hartzea
Azterraldirako araudiaren arabera, Bikario Nagusia eta Lurralde BIkarioa aukeratzeko prozesuan honeek parte hartu daikie: ministerio ordenatuek (abade, fraile eta diakono) banakako botoagaz, laikoen ordezkaritza zabalak ardurakidetasun-organoen, pastoral batzordeen, biziera sagaraturako institutuen, mobimentuen, alkarteen eta bikaritza mahaien bidez; honeek talde-botoa emongo dabe.
Hautaketan, talde baten baino gehiagotan dagozanek behin bakarrik parte hartu daikie. Jardunbidean zehaztasunak emoten dira, besteak beste, papertxoen eta kartazalen erabilerari buruz, botoaren konfidentzialtasuna ziurtatzeko.
Lurralde bikarioen epe kanonikoaren betetzea eta Bikario Nagusiaren karguari sinodo-oinarriak borondatez ezartzea batzen dituan prozesu honen bidez, Bilboko eleizbarrutiak parte-hartzea, gardentasuna eta etenbako ebaluazinoa lehenesten dituan gobernu-ereduaren aldeko konpromisoa berretsi gura dau.
