Euskalerriko Eskautak Bizkaia mobimenduko begirale boluntarioek kurtsoari hasiera emongo deutsoe asteburuan, irailaren 19 eta 20an, Derioko Seminario zaharrean, 200 lagun inguru bertan dala. Gaur egundo errealitatearen inguruan gogoeta egingo dabe eta esperientziak eta ikaskuntzak batera jarriko dabez, etorkizunari begira hobetze eta konpromisoak zehaztuz. Boluntario ohiak batzen dituan Asabak taldearen ahalaz be jardungo dabe.
Zapatuz
Goizeko hamarretan emongo deutsoe hasiera saioari, Bizkaiko 29 taldeei harrera eginez. Zuzendaritza-taldeak ondo etorria egingo deutse gogoetarako dinamiketan parte hartuko dabenei eta hasierako heziketa jasoko daben begirale barriei.
Zapatu goizez, neska-mutikoen arloaren inguruan jardungo dabe, izan be, Mikel Aspano mobimentuko Bizkaiko ordezkariaren esanetan, “mobimentu honetan egotearen arrazoi diralako”.
Taldeek euren erealitatearen barri emongo dabe guztien gorabeherak ezagutuz: begirale barriak, talde bakotxaren lotura eta jarraipena eta inguruan daben eragin eta zabalkundea. Asabak taldeak guzti hau gauzatzeko ze laguntza emon leiken be aztertuko dabe.
Amaitzeko, erronka eta ikaskuntzak batera jarriko dabez, Eukaristia ospatuko da Alex Andreu mobimentuko kontsiliarioa buru dala eta joko eta jarduerak burutuko dabez.
Domekaz
Lana barrutika antolatuko da. Talde bakotxak bere preminak aztertuko ditu eta urte honetan mobimentuarentzat jarritako helburu estratejikoakaz lotuko. Hasierako heziketa jasoko daben begiraleek oinarrizko saioan parte hartuko dabe “Ingurune segurua” gaiaren inguruan. Apustu garrantzitsua da taldeen eguneroko jardueretarako. Jardunaldiei amaiera emoteko, Euskalerriko Eskautak Bizkaia mobimentuaren etorkizunari begira konpromisoa hartu gura daben pertsona guztien partaidetzarako zabalik diran lan-mahaiak aurkeztuko dira.
