Bere tesia jentaurrean aurkeztuz, Eleizbarrutiko Teologia eta Pastoraltza Institutuko (ETPI) zuzendariak amaiera emongo deutso “Eleizbarrutiko aurreko gobernu-taldearen aginduz” hasi eban heziketa prozesuari.
Hauxe da tesiaren titulua: ‘Identidades líquidas y conversión cristiana: La propuesta del Evangelio a la generación millennial’. Lanean, 1981 eta 1993 bitartean jaiotako gazteriak fede katolikoagaz dauan loturan sakondu dau, Eleizaz daben ikuspuntua eta Ebanjelioan jasoten dan Kristoren mezua zelan heltzen jaken aztertuz. Estrellak azaldu dauanez, “neuk aukeratuta, bizitza profesionalean teologiaren zabalkundea izan dot xede, pastoral joera argiaz eta horixe nabarmenduko neuke lan honetan be”. Honen haritik, ikerketan sakontzeko erabili izan dauan bibliografia gehiena Eleizbarrutiko Teologia eta Pastoraltza Institutuko liburutegian aurkitu dau, bere esanetan “bere espezialitatea pastoraltza da-eta”.
Teologian lizentziatua Deustuko Fakultatetik, ezkonduta dago eta seme-alaba bi ditu. Hainbat gogoeta idatzi dau erlejinoari, gizarteari eta Eleizari buruz.
Doktore egingo dan hirugarren emakumea Gasteizko Fakultatean
Epaimahaiak bihar bertan erabakiko dau, bere defentsa entzun ondoren, Estrella Moreno gai dan eta, ondorioz, egoitza Vitoria -Gasteizen dauan Espainiako Iparraldeko Teologia-fakultatearen 56 urteko historian Teologia-doktoregoa jadesten dauan hirugarren emakume bihurtzen dan.
Fakultate hau sortu zanetik, 18 ikaslek -emakume 2k- jadetsi dabe doktore titulua teologian. Horren inguruan galdetuta, zera dino: “guztion funtsari zerbait gehiago eranstea da nire asmoa, ekarpena egin alkartean batera eraikitzen dihardugunari”.
