Lehen Hezkuntzako 3. eta 4. mailako ikasleak eta Barakaldoko ikastetxeetako gurasoen alkarteak arduratzen dira azokaren antolaketaz. Erabilitako jostailuak batzen dira, aztertu eta garbitu ondoren salgai jarteko eta salmentan jasotako dirua alkartasunez banatzeko. Caritasen gizarte jantokiak 70 laguni emoten deutso jaten egunero. Urte honetan, 20.000 menutik gora emon dabez.
Elena Unzueta Caritas Bizkaia erakundeko zuzendaria azokaren aurkezpenean izan zan atzo. Unzuetak azaldu ebanez, Barakaldoko ikasleek hainbat saio izaten dabez Caritas Bizkaia erakundearen ingurukoen barri jasoteko: “lagun askori gertatzen jakon lez, ‘bizilekurik ez izateak’ dakarzan ondorioei buruz hitz egiten jake eta pobretasuna, ekonomikoa eta beste hainbat alderdi eta mailatakoa, agertzen. Azken baten, gure kaleetan eta gaurko gizartean hedatuta dagoan errealitatearen ingurukoak azaltzen jakez eta Caritasek horri aurre egiteko zer egiten dauan be ikusten dabe. Gure egiteko horretan, administrazino publikoen laguntza be badogu eta, jakina, errealitate hori agertzera emoten dauan, hori ezabatzen ahalegintzen dan eta bere gen solidarioa premina gorrian dagoanaren alde jarten dauan herritar bakotxarena”.
Amaia del Campo Barakaldoko alkatearen esanetan, “umeen azoka solidario honek erakusten deusku Barakaldoren nortasuna: herri solidarioa, balio horreek umeei helarazoten dakiana. Ikastetxeetako gurasoen alkarteen eskutik, urtero 550 ikasletik gora konprometitzen da jarduera honetan, eta banatzearen eta premina gorrian dagozanei laguntzearen garrantziaz jabearazoten dabez. Ez dago honako jarduerarik egiten dauan beste herririk bizkaian. Harro gagoz ikasleez, gurasoen alkarteez, ikastetxeez eta urtez urte azokara datozan herritarrez”. Alkateaz eta Caritaseko zuzendariagaz batera, Gema Orbe bizilekurik ez daukien pertsonei zuzendutako arloko arduraduna be izan zan aurkezpenean.
Alkartasun eta heziketarako egitasmoa
Hogeta bigarren ekitaldia ospatuko dauan umeen azoka solidarioak alderdi bi lantzen ditu: alkartasuna eta heziketa. Guzti hori Caritasen eskutik egiten dau eta Lehen Hezkuntzako 3. eta 4. mailako 1.860 ikasle ingururengana iristen da.
Jarduera honen bitartez, 400.000 euro inguru batu dira urteotan.
