Ordu bete eta erdi inguru iraungo dau Elexaldeko Andra Mari eleizan (Galdakao) egingo dan bisita gidatuak. Bisitariek, Donejakue bideko bigarren mailako ibilbide baten eraikitako erdi aroko eraikin bikain honen sekretuak ezagutuko dabez.
Errenazimentuko artelan aitzindaria
Andra Mariari eskainitako eleiza hau Elexalden dago, hau da izena emoten deutsan (eleiz-alde) Galdakaoko auzorik garrantsitsuenean. Antxina, “kostaldeko bidea” deitutakoa, Donejakue Bideko bigarren mailako ibilbidea, igaroten zan hemendik. XIII. gizaldian hasi ziran eleiza eraikitzen eta aldi horretakoak dira hegoaldeko ataria, erromaniko estilokoa, dagoeneko gotikorako trantsizinoa erakusten dauana. Erdi aroko lehenengo eleiza hau XVI. gizaldian handiagotu eben, errenazimentuko estiloan. Sasoi honetakoa da altara nagusiko erretaula.
Erretaula nagusian, Andra Mariaren irudi berezia dago.
Eskultura hau da erretaulan dagozanen artean zaharrena, eta gainerakoek baino berrehun urte gehiago be baditu. Dana dala, XVI. gizaldian, orain dagoan lekuan jarri ebenean, barriro margotu ebela emoten dau. 1300 inguruan egindakoa, Euskadiko amabirjina erromaniko bakarrenetakoa da. Maria eserita agertzen da umea altzoan dauala, hau da Amabirjina-troonu erakoa da, Euskal Herrian, Andra Mari deitzen dana.
Irudiaren zurruntasuna nabarmentzen da eta aurpegiek ez dabe adierazmenik, erdi aroko irudietan ohikoa danez.
Areto-eleiza
Elexaldeko Andra Mari, areto-eleiza da.Alkarren Barri aldizkarian aurkeztutako erreportaje-sorta honetan, Bizkaian ezaugarri horregaz eraiki ziran eleizak ikusi daitekez.
