Bilboko Eleizbarrutian, parrokia, alkarte, erakunde eta gizabanako askok dihardu Valentziako zoritxarraren biktimei laguntzen.
Esate baterako, Caritas Bizkaia, erakundearen bitartez, 150.000 euro batu dira -joan dan barikura arte- eta dagoeneko diru hori bialdu dabe kaltetutako lekuetara.
100.000 euro Caritas Valentzia erakundearen esku itzi dabez, hortxe izan da-eta triskantza handiena. Gainerako 50.000 euroak kaltetutako gainerako inguruetan erabiliko dabez Caritas Espainiaren bitartez.
Larrialdi honetan, beste askotan lez, diruz-laguntzea egokientzat joten dabe Caritasen. Kaltetutako inguruetako Caritasek adierazotakoaren arabera, “espeziean emoten dan laguntzak logistika eta garraioa korapilatu egin leike eta baleiteke gauzak helmugara ez heltzea eta unean uneko preminei erantzuteko egoki ez izatea”.
Caritas Bizkaia erakundetik gogoratzen dabenez, eurei egindako ekarpen ekonomikoak emondako kopuruagaitik %45eko kenketa izango dau PFEZaren kuota osoan.
Proposamena parrokiei
Gotzain Kontseiluak dei egin deutse hondamendi honi begira ekintzarik egin ez daben parrokiei azaroaren 24ko koletetan batutako dirua horretarako zuzendu daien, diru hori Bilboko Eleizbarrutiko Caritasek proposatutako kontu-zenbakietan sartuz.
