Hori holan dala, Bizkaia isilik bilkurak sustatzen dabezanen esanetan, “egiturazko desbardintasun hau ez da halabeharrezkoa, gizatalde ahulenen bazterketa betikotu egiten dauan eta, azken urteetan ikusi dogunez, etorkinei neurriz kanpo eragiten deutsien krisialdietan areagotu egiten dan gizarte-ekonomia sistemaren emaitza baino”.
Bilkura isilak 19:30etan egingo dira, ohiko lekuetan: Bilbon, Arriaga plazan; Portugaleten, Gregorio Uzkiano kalean; Barakaldon, Bide Onera plazan; Galdakaon, Iturriondo plazan; Durangon, Andra Mari eleipean; Balmasedan, San Severino plazan; Getxon, Telletxe plazan (metroaren ondoan) eta Zornotzan, Herriko plazan.
Gainera, bilkuretan, “Ekialde Ertaineko gerra eta, bereziki, Libanori eragiten deutsana gogoratu gura dogu. Herrialde honek 1,5 miloe errefuxiatu siriar, 400.000 palestinar eta 160.000 langile etorkin hartu izan ditu baldintza oso eskasetan eta orain, israeldarren erasoa hasi zanetik, larrialdi humanitario suntsitzailea bizi dau eta milaka familia geratu da beharrizan gorrian”.
Bizkaia isilik ekimenak deituta, hurrengo bilkura azaroaren 27an -eguaztena- izango da.
