2025ean, Bilboko eleizbarrutiaren 75. urteurrena ospatu dogu. Hain zuzen be, datorren domekaz, oroitzapenezko ekitaldiei amaiera emongo jake. Urte hau, Bake eta Adiskidetzerako Batzordetik azaldu dabenez, “oroimena egiteko eta bizi izandako historiatik ikasteko aukera izaten ari da. Atsekabe handia, zauri sakonak eta biktimak eragin dituan gatazkek eta indarkeriek arrasto sakona itzi dabe 75 urteotan. Aldi berean, Jesusen Jainkoak eten barik erein ditu bere Erreinuaren haziak eta indarkeriari aurre egiteko ahaleginak adoretu, gizon eta emakume guztien duintasunaren alde eginez eta entzute, hartu-emon eta enpatiarako eremuen bidez bizikidetza normalizatua bilatuz”
Itxaropenaren Jubileuak sasoirik gogorrenetan jasandako indarkeriaren basakeriari eta gaur egun indarrean diran indarkeriei begiak ez ixtera deitzen gaitu. Ezinbestekoa dogu kristau nortasunaren oinarrizko printzipioetatik gure etorkizunaren zimenduak ipintzeko oroimen eta adiskidetzerako eremuak eskeintzen jarraitzea.
Batera jarri eta oroitu
Bake eta Adiskidetzerako Batzordetik jakinarazo dabenez, datozan asteetan ekitaldiak proposatuko dabez lurraldeetan (pastoral barrutian edo bikaritzan) gure gogoetak batera jarteko eta oroitzeko, “biktimenganako sentiberatasuna bizteko eta indarkeriari zilegitasuna kentzeko”.
Hauxe da egiten deuskuen eskaria: “Azaroaren 10ean, kontuan hartu egizue zuen otoitzean gertu dozuen biktimaren baten egoera. Jesusen Jainkoaren aurrean jarri eta errezatu ondorengo otoitz hau edo besteren bat hainbeste lagunek jasandako oinazetik eta zauriak sendatzen eta bihotzak adiskidetzen lagunduko deuskun oroimen zuzenaren guraritik”.
Emoiguzu, Jauna, kanposantuetako bakea
eta batzuei egundoko irabazia dakartsen bakea
salatzen dauan bake artega.
Emoiguzu bakearen alde borrokatzen dauan bakea.
Erreinuaren preminaz
astintzen gaituan bakea.
Espirituaren indarraz
ohikeria eta bildurrean,
hondartzetako lasaitasunean
eta babeslekuko otoitzean
barru-barruraino sartzen dan bakea.
Apurtutako armen bakea,
armen porrotetako bakea.
Zuzentasun-gosearen bakea.
Lortutako askatasunaren bakea.
Hesi eta muga barik
“geure” egiten dan bakea.
Hau da, shalom, salaam,
parkamena itzulera, besarkada.
Emoiguzu zure bakea.
Betleemen letraka esaten dan
eta kurutzean azkenetan dan
eta Pazkoan garaile dan bakea.
Emoiguzu, Jauna, bakean izten ez gaituan
bake artega ha.
Pedro Casaldaliga
