Otoitz, senidetasun eta itxaropenezko giroan bizi izan ebezan lau unetan banatu zan kurtso hasierako ekitaldia.
Zahartzaroa, jakinduria eta itxaropenezko oparia
Hasierako otoitzaldian Frantzisko “aitita-amamen aita santuaren” katekesietako txatalak gogora ekarri ebezan. 2022ko otsailaren 23an, Frantzisko aita santuak zahartzaroaren esanahi eta balioari buruzko katekesi-ibilbidea hasi eban, Moises, Eleazar eta Judith bezalako Bibliako irudiak erreferentziatzat hartuz.
Pertsonaia horreen bidez, aita santuak nagusi dan kulturaren estereotipoakaz zerikusirik ez dauan begiradaz baliatu zan pertsona nagusiez hitz egiteko. Zahartzaroak jakinduria, maitasun-ondarea, borroka, itxaropena, samurtasuna eta Jainkoarenganantz garoazan bidea irudikatzen dau.
“Edadetua aurrerantz doa, edadetua helmugarantz doa, Jainkoaren zerurantz, edadetuak bizitzan bizi izandako jakinduriagaz bide egiten dihardu”.
Gogoeta honen bidez, dei egin jaken partaideei pertsona nagusien urteetako esperientziaren eta gizarteari eta belaunaldi barriei eskeintzen deutsen giza aberastasuna eta aberastasun espiritualaren balioa autortu dagien.
Zaindu eta lagun eta abegi egiten dauan familia
Hasierako otoitzaldiaren ostean, Maria Jesus Beascoechea mobimentuko presidenteak kurtso barrirako aurreikusitako jardueren egitaraua aurkeztu eban. Gainera, Vida Ascendente/Bizian Gora mobimentuaren sen eta nortasuna gogoratu eban, besteak beste, hauxe nabarmenduz: “Jainkoaren doea da, ez bakarrik kideen euren erabilerarako, besteen aldeko zerbitzurako argi izan behar dauan grazia baino”.
Dei egin eutsen partaideei mobimentua benetako familia lez bizi dagien, alkar zaintzeko, laguntzeko eta onartzeko aukera emoten deutsen familia. Ikuspuntu honek Leon XIV.a aita santuak Pertsona Nagusien Pastoraltzaren inguruko Nazinoarteko II. Biltzarrean esandakoagaz bat egiten dau: “pertsona nagusiak onartu egin behar dogun doe, bedeinkapen, dira”.
Ikuspuntu honetatik, Vida Ascendente/Bizian Gora mobimentuak jubilatu eta nagusiei lagun egiteko bokazinoan berretsi da. Pertsona nagusien hazkunde espirituala ahalbidetzea eta Eleizan eta gizarteak euren parte-hartze eraginkorra sustatzea ditu helburutzat.
Zailtasunetan alkarri lagundu hazten jarraitzeko
Batzarrean, taldeek euren esperientzia eta eretxiak batera jarri ebezan, saioa aberastuz. Alkarri entzunez hartu-emon eraikitzaile eta oparoa izan zan.
Zailtasunei dagokienez, honeek aitatu ebezan, besteak beste: kide-kopuruak behera egitea, urteak betetzeak dakarzan gaixotasunak eta mobimentua ezagutzera emoteko premina. Oraindik jenteak ez dau ondo ezagutzen mobimentua eta kideentzat ze onuragarria dan.
Zailtasunak zailtasun, mobimentuaren egitekoa garatzen eta horretan sakontzen jarraitzeko borondate argia agertu eben. Partaideek euren hiru zutabe nagusien -espiritualtasuna, apostolutza eta adiskidetasuna- garrantzia berretsi eben. Hiru alderdi osagarri dira eta zahartzaroa zentzunez bizitzeko aukera emoten dabe. Ezinbestekotzat jo eben fedea alkartuta bizitzea, loturak estutzea eta besteen aldeko konpromisoari bizirik eustea.
Urteetan aurrera joanda, zailtasunak ez dira desagertzen, baina, era berean, hazi egiten da Vida Ascendente/Bizian Gora mobimentuko kide izateak hainbeste laguni emon deutson bizi-poz eta ilusinoa.
Kontuak onartu eta etorkizunera begiratu
Saioari amaiera emon aurretik, kontuak aurkeztu ziran eta, datuak ezagutu ondoren, partaideek kudeaketa eta emaitzak onartu egin ebezan.
Batzarrari amaiera emon eutson otoitzaldian, Jesusegaz bat egin eben Aitari otoitz egiteko bere eskuetan jarriz kurtso barria, aurreikusitako jarduerak eta taldeen bizitza.
Frantzisko aita santuak gogoratu ebanez, pertsona nagusiek, Moisesek lez, “historia ikusi eta historia transmititu egiten dabe”, eta, gainera, “argitasun honegaz bizi dan zahartzaroa opari bikain da hurrengo belaunaldiarentzat”.
Berba honeek laburbiltzen dabe Vida Ascendente/Bizian Gora mobimentuaren sena aldi barriaren hasieran. Esperientzia baloratu, fedea beste batzukaz batera bizi, adiskidetasuna landu eta besteei nork bere onena emoten jarraitu.
