Ebenjelioa eta Irakurgaiak

Etorriko da santutegira zuek bila zabilzen Jauna.

Malakias profetaren liburutik
Ml 3, 1-4

Hau dino Jainko Jaunak: «Hor bialtzen dot neure mezularia, nire aurretik bidea prestatzera. Eta berehala etorriko da bere santutegira zuek bila zabilzen Nagusia, eta gogo biziz gura dozuen ituneko mezularia. Horra non datorren —dino Jaun ahalguztidunak—.
Nork jasan haren etorrera-eguna? Nor zutunik egon, Ha agertzean? Urtzailearen sua lez izango da, garbitzailearen lixibea lez. Urtu eta garbitzeko jesarriko da; zidarra eta urrea garbitzen diran lez, halantxe garbituko ditu Leviren ondorengoak, Jaunari opariak behar dan lez eskeini deioezan. Orduan, atsegin izango jako Jaunari Judako eta Jerusalemeko oparia, lehengo sasoietan lez.

Gauza guztietan senideen antzeko izan behar eban, errukiorra izan zedin.

Hebrearrei egindako gutunetik
Heb 2, 14-18

Familia bereko seme-alabek odol eta haragi bat bera daben lez, Jesusek giza odol-haragiak hartu zituan, bere heriotzaz heriotzaren nagusia dan deabrua ezerezteko, eta heriotzearen bildurrez euren bizitza osoan esklabo bizi ziranak askatzeko; ha ez zan-eta aingeruei laguntzera etorri, Abrahamen jatorrikoei baino. Horregaitik, gauza guztietan bere senideen antzeko izan behar eban, abade nagusi errukitsu eta Jainkoari jagokozan gauzetan fidagarri izateko, herriaren pekatuak parkatzeko gai.
Bera ere nekeetan probatua izan zalako, gauza da orain probaldian dagozanei laguntzeko.

Sal 23, 7. 8. 9. 10

R/. Jaun ahalguztiduna, Bera da Errege ospetsua.

Ateburuok, zabaldu zaiteze,
zabaldu zaiteze, aspaldiko ateok,
badator-eta Errege ospetsua. R/.

Nor da Errege ospetsu hori?
Jauna da, indartsu eta ahaltsua,
Jauna, guduan ahaltsua. R/.

Ateburuak, zabaldu zaiteze,
zabaldu zaiteze, aspaldiko ateok,
badator-eta Errege ospetsua. R/.

Nor da Errege ospetsu hori?
Jaun ahalguztiduna,
Bera da Errege ospetsua. R/.

Atzerria argitzeko argia.

Jesu Kristoren Ebanjelioa San Lukasen liburutik
Lk 2, 22-35

Moisesen Legearen arabera, amari garbikuntza egiteko unea heldu jakonean, gurasoek Jerusalemera eroan eben Jesus, Jaunari aurkezteko. [Izan ere, honan dago aginduta Jaunaren legean: «Lehen-seme guztiak Jaunari sagaratuko jakoz». Jaunaren legean ezarritako oparia ere eskeini behar eben: «Usapal bi edota usakume bi».
Bazan Jerusalemen Simeon izeneko gizon bat, gizon zintzo eta jainkozalea, Jainkoak Israel noiz kontsolatuko zain egoana. Espiritu Santua beragaz eban, eta aditzera emon eutsan ez zala hilgo Jaunaren Mesias ikusi arte. Eta Espiritu Santuak eraginda tenplura joan zan.
Gurasoek Legeak agintzen ebana beteteko Jesus umea tenpluan sartzean, hartu eban Simeonek umea besoetan eta Jainkoa bedeinkatu eban, esanez:
«Orain itzi daikezu, Jauna,
zeure morroi hau bakean hilten,
Zeuk agindu zenduan lez.
Ikusi dabe nire begiok Zugandiko salbamena,
herri guztien aurrean Zuk aurkeztua:
Nazinoak argitzeko argia
eta zure herri Israelen ospea».
Umearen aitamak harriturik egozan umeagaitik esaten ziranakin. Eta Simeonek bedeinkatu egin zituan, eta umearen ama Mariari esan eutsan:«Begira, hau israeldar asko jausteko eta beste asko jagiteko ipinita dago; eztabaida sortzen dauan ezaugarri izango da, holan bihotz askotako asmoak agirian gelditu daitezan. Eta zeuri ezpata batek aldez alde zulatuko deutsu arimea».