Ebenjelioa eta Irakurgaiak

Hori da, Jaunak esaten eban gizona; Saul izango dau errege bere herriak.

Samuelen lehenengo liburutik
1 Sm 9, 1-4. 17-19; 10, 1ª

Aldi haretan, bazan Kix eritzon gizon handiki bat, Abielen semea —Abiel Tzerorren semea zan, Tzeror Bekoratena eta Bekorat Afiahena—. Kix Benjaminen leinukoa zan. Seme bat eban, Saul izenekoa, mutil aukerakoa eta bikaina. Ez zan Israelen ha baizen ederrik: gainerako guztiak doi-doi heltzen jakozan sorbaldara.
Saulen aita Kixi asteme batzuk galdu jakozan eta esan eutsan Saul semeari: «Hartu egizu zeugaz morroietako bat eta zoaz astemeen bila». Efraimeko mendian eta Xalixako lurretan barrena ibili ziran, baina ez ebezan aurkitu; igaro eben Xaalimeko lurraldea, baina ez egozan han; baita Benjamin lurraldea ere, baina ez eben ezer aurkitu.
Samuelek Saul ikusi ebanean, Jaunak esan eutsan: «Horra hor esan neutsun gizona. Hori izango da nire herriaren agintaria».
Hurreratu jakon Saul Samueli uriko atearen erdian, eta esan eutsan: «Esaidazu, mesedez, non dan ikuslearen etxea». Samuelek erantzun eutsan: «Neu naz ikuslea. Igon nire aurretik mendira eta gaur nigaz jango dozue. Bihar goizean itziko deutsut joaten, jakin gura dozun guztia esan ondoren».
Hartu eban Samuelek oriontzia eta Sauli burura isuri eutsan; gero, besarkatuz, esan eutsan: «Hara, Jaunak bere herri Israelen buruzagi igurtzi zaitu. Zuk gidatuko dozu Jaunaren herria eta askatuko inguruan dituan arerioen eskuetatik».

Sal 20, 2-3. 4-5. 6-7

R/. Jauna, erregea zure indarraz pozten da.

Jauna, erregea zure indarraz pozten da,
zure garaipenaz izugarri alaitzen.
Gura ebana emon deutsazu
eta harek eskatutakoa ez deutsazu ukatu. R/.

Bedeinkapenez eta mesedez bete dozu,
urre garbizko koroea ezarri deutsazu buruan.
Bizia eskatu deutsu, eta Zuk emon,
haren egunak betiko luzatuz. R/.

Zure garaipenaz handia da haren ospea,
aintzaz eta ohorez inguratu dozu.
Izan ere, betiko bedeinkapena emon deutsazu,
pozez bete dozu zeure aurrean. R/.

Ez naz zintzoei dei egitera etorri, pekatariei baino.

Jesu Kristoren Ebanjelioa San Markosen liburutik
Mk 2, 13-17

Aldi haretan, Jesusek itsaso aldera urten eban barriro. Jente guztia Beragana joakon, eta irakasten hasi jaken. Bidez joiala, Levi Alfeorena ikusi eban, zergak batzeko mahaian jesarrita, eta esan eutsan: «Jarraitu Niri». Levik zutitu eta jarraitu egin eutsan.
Geroago, Jesus mahaian egoan Leviren etxean; bazan beste zergalari eta pekatari asko ere Jesusegaz eta honen ikasleekin mahaian; izan ere, asko joakozan ondoren.
Fariseu lege-maisu batzuek, pekatari eta zergalariekaz jaten ziharduala ikustean, esan eutseen ikasleei: «Zelan jaten dau zergalari eta pekatariekin?»
Hori entzutean, Jesusek esan eutsen: «Ez dabe osasundunek behar osagilea, gaixoek baino; ez naz zintzoei dei egitera etorri, pekatariei baino».

SARRERAKO OHARRA

Anai-arrebok, ondo etorriak ospakizun honetara. Jesusen Hitzak eta jarrerak lagun asko liluratzen du eta ikasleen taldea hazi egiten da, gaurko irakurgaian entzungo dogunez. Jaunak geu be liluratu egin gaitu eta, horregaitik, zutunik eta abestuz ekingo deutsagu ospakizunari.


DAMU OTOITZA

Jarri dagigun gure bihotza Jainkoaren eskuetan eta eskatu dagigun parkamena gure pekatuengaitik.

- Garan lez ikusten gaituzu. ERRUKI, JAUNA.
- Bilatu eta abegi egiten deuskuzu. KRISTO, ERRUKI.
- Maite gaituzu. ERRUKI, JAUNA.

Erruki dakigula Jainko guztiz ahaltsua eta gure pekatuak parkaturik eroan gaizala betiko bizitzara. Amen.


OHARRA LEHENENGO IRAKURGAIARI

Samuelen liburutik hartutako gaurko irakurgaian, herriaren eskaria baztertu arren, Saul errege sagaratuko dabe. Hauxe izan zan Israeleko lehenengo erregea. Arretaz entzun dagigun.


OHARRA EBANJELIOARI

Hamabien taldea osotzen dihardu Jesusek. Markosen ebanjeliotik hartutako pasarte honetan, Jesusen eta idazlari eta fariseuen arteko gatazka agertuko da. Atzo eztabaidan aritu ziran pekatuen parkamena dala-eta; gaur pekatariek kutsatu egin dabela da eztabaidarakokontua. Zutunik abestuz prestatuko gara ebanjelioa entzuteko.


JAINKOAREN HERRIAREN OTOITZA

Jaunak bide egiten dihardu, eta Levigaz egin eban lez, gaur be, banan-banan begiratzen gaitu. Erakarri gagizala bere errukiak eta zuzendu deioguzan gure eskariak.

1. Aita Santuaren, gotzainen, abadeen eta diakonoen alde. Jainkoak batasun-sena emon deiela lankidetzan jardun eta alkar ulertu dagien. ESKATU DEIOGUN JAUNARI.
2. Saulek lez, agintea dabenen alde. Samuel bezalako Jainkoaren gizon eta emakumez inguratuta, erabakiak Barri Onaren argitan hartu dagiezan. ESKATU DEIOGUN JAUNARI.
3. Itxaropena galdu dabenen edo pekatuak kateatuta bizi diranen alde. Barri Onaren iragarpena eta Aitaren begirada errukitsua jaso dagiezan. ESKATU DEIOGUN JAUNARI.
4. Gu guztion alde. Jainkoaren deia atzeman dagigun eguneroko bizitzako gertaera arruntetan. ESKATU DEIOGUN JAUNARI.

Aita Jainkoa, gure pekatuak parkatzen dozuzana, onartu eskariok eta gure bihotzetan doguzanak. Jesukristo gure Jaunaren bitartez.