Eleizbarrutiaren 75. urteurrenari lotuta prestatutako erakusketa bikaritza guztietan egogngo da ikusgai. Aste honetan Begoñako basilikan izango da eta datorren astetik aurrera Bilboko San Bizente eleizan.
Erakusketaz gainera, Bizkaiko Eleizaren Historia Artxiboak eta Komunikazinorako Eleizbarrutiko Sailak denpora-lerro birtuala prestatu dabe. Bertara sartzeko era paneletan txertatutako QR kodeen bidez da. Honeek 75. urteurrenerako atondutako webgunera garoez.
Anabella Barroso artxiboko zuzendariak Radio Popular-Herri Irratian emon ditu erakusketari buruzko xehetasunak.
Azken panela, zuriz
Erakusketari hasiera emoten deutsan panelean, aurkezpena egiten da, besteak beste “hainbat gizaldi da kristau alkartea lurraldean” dagoala azalduz, Barrosok agiriak, arkeologia-hondakinak eta ermita eta eleiza ugariak aitatuz.
Azken panela, hamargarrena, zuriz dago eta “Etorkizunari begira” izenburua dauka. Barrosoren esanetan, “jarri daiten lekuetan, bisitariek etorkizunari begira dabezan ametsak idatzi daiezan”.
Erakusketan Bilboko Eleizbarrutiaren 75 urteko historiaren errepasoa egiteaz batera, dei egiten jako alkarteari “etorkizuna amestu daian”.
Bikaritza bakotxean, azken panelaren argazkia egin eta post-itak batu egingo dira, lurralde guztietako pertsona guztien ametsak batzeko. 75. urteurreneko ekitaldiak amaitzeaz batera, mezu guztiak panel barri baten jasotea da asmoa.
Erakusketa bizi eta eraginkorra
Komunikazinoarako Sailetik eta AHEB-BEHAtik dei egiten dabe, guztion oroimena aberasteko baliagarri izan daitekezan argazki, lekukotasun eta agiriak batera jarteko.
“Nahi izan ezkero, lagungarriak artxibora edo 75. urteurrenerako webgunera bialdu daitekez. Guk digitalizatu eta ondo gordeko doguz. Danok historia honetako partaide sentitzea gura dogu eta euren ekarpenak baliagarri izatea gure atzetik datozanentzat”, azaldu dau Anabellak.
Erakusketa paper eta multimedia euskarrian
Kurtso honetan, Artxiboak sail barria dau Alkarren Barri aldizkarian. 75. urteurrenari eskainitako orrian, erakusketa ibiltariaren panelakaz bat, Bizkaiko Eleizaren historiako hamarkada bakotxeko gertaera gogoangarriak jasoten dira. Multimedia euskarrian, idatzizko kontaketari oinarrizko gertaeren bideoa gehitu jako.
