Ebanjelizatzearen Eleizbarrutiko Egitasmoak aldi barriari ekingo deutso, gotzainari aholku emoten deutsen Kontseiluetan egindako gogoetaren ostean. Eleizbarrutiko Pastoral Kontseiluaren (EPK) azken saioan, kontseilu-kideek “anitz eta ilusionagarritzat” jo eben kontseilua, baina “estrategia baino gehiago bizipena nabarmentzen” dauan egitasmo lez. Euren ustez, ez da erraza ekintzak lehenestea. Hainbat lekutan, egitasmoa nork bere egin eta garatzeko irakurketa hori ezin izan dabela egin be aitatu zan. Horregaitik, erantzunak iraultzeko epea barriro zabaldu da: hemen.
Proposatutako ekintzak sistematizatzeko lan-taldeak
Batzorde Teknikotik azaldu dabenez, “aniztasuna handia izan da eta azpimarra ugari agertu da erantzunetan”. Honen haritik eta Eleizako askotariko alkarte eta erakundeei datorren kurtsoa VI. Egitasmoan jasoten dan azpimarraren bat kontuan hartuta programatzen laguntzeko”, taldeak osatzea proposatu zan, nabarmendu daiteken hainbat kontu zehazteko eta sistematizatzeko. Horretarako, Egitasmoaren erronka bakotxeko taldea eratuko da, Batzorde Teknikoko eta Eleizbarrutiko Pastoral Kontseiluko kideez osatuta. Talde honeek zehaztuko dabez taldeek gehien proposatutako azpimarrak, beste hainbat errealidadetan errezen bultzatu daitekezan ekintzak eta Bizkaiko alkarte katolikoek ikusi dabezan barritasunik aitagarrienak, Egitasmoa gauzatu ahal izateko.
Eleizbarrutiko Egitasmoaren kronograma
Eleizbarrutiko Pastoral Kontseiluaren gogoetaren ondorioz proposatu daiten ildo nagusia zehaztu ondoren, Abade Kontseiluak biderik egokienak bilatuko ditu pastoral eragileek euren eleiz eremuetako prozesuan lagundu daien.
Indarrean dan pastoral kurtso hau amaitu aurretik, Eleizbarrutiko Kontseilu biek Gotzain Kontseiluari aurkeztuko deutsez euren lanak, “bermea eta adorea emon daian gure Eleizaren egiteko ebanjelizatzailea Eleizbarrutiaren mila koloreak ordezkatzen dabezanen baterako lanetik sortutako azpimarra eta ildo nagusien arabera bizi ahal izateko”.
