Barriak

Ikasturtea amaitu eta oporrak hartuta, udako kanpamentuak egiten be hasi dira, esate baterako, Gernikako Kosnoaga aisialdirako taldea Urkiolan da udaldiko lehenengo egunak igarotzen. 

Egunotan, Errekarte Pastoral Barrutiko (PB) Gaztenahiak taldea kanpamentuan da Orobion. Domekaz egun berezia bizi izan eben, hain zuzen be, "Familien eguna", familiakaz, begiraleakaz eta Jose Alberto Guemes PBko parrokoagaz. 

HOAC mobimentuaren batzar nagusia, kanpai-kontzertua Begoñan, sendotzak eta omenaldia kurtso honetan Algortari agur esango deutsan Javi Garai abadeari, horra hor, besteak beste, azken egunotako jarduerak.

Bilboko Eleizbarrutiko alkarte latinoamerikarrak atzoko egunez Ezkarain ospatu zan kultura anitzetako Iparraldeko nazinoarteko taldeen kurtso amaierako ekitaldian izan zan. Calahorra eta La Calzada-Logroñoko Eleizbarrutia arduratu da aurton harrera egiteaz. 

Zapatuz, Autonomia-Indautxu Pastoral Barrutiko zazpi helduk eta beste leku batzuetako bik kristau sarbideko sakramentuak -Bateoa, Eukaristia eta Sendotza- ospatu ebezan Sortze Garbia parrokian. Fernando Marcos lurralde bikarioa izan zan buru eleizkizunean.

2024-25 kurtsoa hasteaz batera, Bilboko Eleizbarrutian hiru abade barri izango dira. Irailaren 15ean, Juan Reyero, Gorka Campos eta Marco Antonio Muñoz abadegaiak abade egingo dira, Ignacio Fernandez Seminarioko errektoreak joan dan barikuz Bilbon ospatu zan kurtso amaierako ekitaldian iragarri eban lez. Juan, Gorka eta Marco urtearen hasieran ordenatu ziran diakono eta irailaren 15ean egingo dira abade Santiago katedralean, 19:00etan.

Astean zehar webgunean argitaratutako barri nagusiak laburbilduta eskaintzen deutsuguz. Bizkaiko Eleizan asko dira aurrera eroaten diran ekimenak eta webgunean euron arteko batzuk baino ez dira batzen. Zure parrokian, erakundean zein eleiz alkartean gertatzen danaren barri emoteko helbide honetara idatzi zeinke: komunika@bizkeliza.org

Ekainaren 15ean, zapatuz, Ipar-hegoaldea ikastaroaren azken saioa ospatu zan. Bederatzi gaztek parte hartu dabe Misinoek, Eleizbarrutiko Teologia eta Pastoraltza Institutuak eta Caritas Bizkaia erakundeak antolatzen daben ikastaroaren aurtengo ekitaldian. Prozesua burutu ondoren, gazte horreetako bostek misino-esperientzia biziko dabe udan. Lau Boliviara joango dira eta bestea Togora. Ikastaroaren 29 ekitalditan, 400 lagun inguruk parte hartu dau.

Bilboko Eleizbarrutian pastoralgintzan urtebete emon ondoren, Krzysztof Miotek poloniar abadea datozan egunetan joango da bere herrialdera eta egunotan eleiztarrei agur egiten dihardu: joan dan asteburuan, Gallartan, bihar -ekainak 23, domeka- azken meza ospatuko dau La Arboleda eta Trapagaraneko parrokietan eta, azkenik, ekainaren 30ean, Ortuellan eta Mariaren Mirabeakaz Portugaleten.

Datorren astelehenez, ekainak 24, San Joan Bateatzailearen eguna -jaia bere jaiotegunean ospatzen dauan santu bakarra- ospatuko da. Eleizbarrutian, santu honen izenpeko diran ermiten artean, Gaztelugatxekoa dago. Bertan, goizean goizetik ospatuko dira Eukaristiak: 06:30, 07:30, 08:30, 10:30, 11:30 eta 12:30etan.