Barriak

Ekainaren amaieratik hasita, VI. bikaritzako gazteek udako hainbat jardueratan parte hartzeko aukera izan dabe -emon izan dogu batzuen barri bide honetatik...-. Erandio-Astrabuduako Ekintza Katolikoa eta Sopelako Elaiak taldea izan ziran goiztiarrenak eta, esate baterako, lehenengoak ekainaren 26tik uztailaren 2ra Santibañez de Zarzagudan (Burgos) izan ziran konbibentzian eta bigarrenek ohiko jarduerak garatu ebezan ekainaren 22tik 29ra, San Pedroren omenezko jaiakaz bat eginik.

"Zubiak eraikiz, harresiak botaz. Eleiza langileen munduan senidetasunezko lokarriak estutuz" goiburuaren haritik Ekintza Katolikoko Langile Ermandadea mobimentuko militanteek XIV. Batzar Nagusia ospatuko dabe Segovian, abuztuaren 12tik 15era. Bertan izango da zenbait artzapezpiku, gotzain eta eleiz mobimentuetako arduradun, tartean, On Joseba Segura Bilboko gotzaina.

Atzo -eguaztena- abiatu zan Portugalerantz Lisboan, abuztuaren 1etik 6ra, ospatuko dan Gazteen Munduko Egunaren XXXVIII. ekitaldian Bilboko Eleizbarrutitik parte hartuko dabenen lehenengo taldea. Frantzisko Aita Santuak deituta ospatuko dan ekitaldi nagusiaren aurretik "Egunak Eleizbarrutietan" (EE) deitutako jarduera ospatuko da eta mundu osoko gazteak Portugaleko eleizbarrutietako parrokia alkarteetan txertatuko dira. Bilboko taldea VIseuko Eleizbarrutira joan da eta hango familiek egin deutse harrera. 

IV. bikaritzako Argizai eta Inurri eskaut taldeetako hogeta zazpi lagunek prozesu migratzaileen eta erlejinoen eta kulturen arteko hartu-emonen ingurukoak landu izan dabez kurtso osoan. Orain, Rabatetik bueltatu dira, Marokoko uriburuko Lalla Meriem umezurtz-etxean eta Ekialde-Mendebaldea Fundazinoan boluntario lez jardun ondoren. Taldekideen erdiak umezurtz-etxeko ahalmen urriko ume eta gazteei laguntasuna eskaini deutse eta beste erdiak zuzenean ezagutu dau hainbat afrikar herrialdetako gazte etorkin errefuxiatuen egoera.

Gaur, hilaren azken eguaztenez ohikoa danez, 'Bizkaia isilik' bilkurak ospatuko dira ohiko ordu -19:30- eta lekuetan. Bilbon, Arriaga plazan; Portugaleten, Gregorio Uzquiano kalean; Barakaldon, Bide Onera plazan; Galdakaon, Iturriondo plazan; Durangon, Andra Mari eleizpean; Balmasedan, San Severino plazan eta Getxon, Telletxe plazan, metroaren ondoan.

Eguerdiko 12:00etan hasiko da Santiago Apostolu eta Bilbao uriaren zaindariaren egunez bere izenpeko katedralean ospatuko dan Eukaristia. Zuzenean jarraitu daiteke web honen bidez.

Gaur, uztailak 25, Santiago Apostolu eta Bilbao uriaren zaindariaren eguna ospatzen da. Luis Alberto Loyo katedraleko deana buru izango da Santiago katedralean eguerdiko 12:00etan ospatuko dan Eukaristian. Zuzenean jarraitu daiteke web honen bidez. 

Atzo -domeka-, esker oneko Eukaristia ospatu zan, Algortako Berreroslea eleizan lehenengo meza ospatu zala (1973.eko uztailak 21) berrogeta hamar urte beteten zirala-eta. Beste alde batetik, zapatuz, Orduñan, kulturarteko topaketa ospatu zan askotariko alkarte eta kulturarteko taldeetako 30 lagunen partaidetzagaz eta Laudato Si' entziklika ardaztzat hartuta. 

Ekintza Katoliko Espezializatuko gazte eta ikasle mobimentuko (JEC) militanteek -14 eta 30 urte bitarteko gazteak- gaurtik hilaren 30era arte, "Tenplu gara: zaindu daigun, zaindu gaitezan" goiburuaren haritik, Malagan ospatuko dan batzar nagusian parte hartuko dabe. Bilboko Eleizbarrutitik, mobimentuko hainbat kide joango da, esate baterako, Maitane Campos presidentea eta Pedro Luis Arias laguntzailea. 

Astean zehar webgunean argitaratutako barri nagusiak laburbilduta eskaintzen deutsuguz. Bizkaiko Eleizan asko dira aurrera eroaten diran ekimenak eta webgunean euron arteko batzuk baino ez dira batzen. Zure parrokian, erakundean zein eleiz alkartean gertatzen danaren barri emoteko helbide honetara idatzi zeinke: komunika@bizkeliza.org