Eguna joan, eguna etorri, alerta horian gagoz egun honeetan eta hori dala-eta Bilboko Udalak dei larria egin deutse herritarrei -eta bereziki umee, pertsona nagusiei eta osasun-arazoren bat dabenei- eguzkitan egon ez daitezan, likido ugari hartu daien eta tenperaturak euren gorenean dagozan orduetan ahalegin fisikorik egin ez daien. Bilbon, gainera, ekipamendu edo eremuak -klima-babeslekuak- dagoz herritarrak muturreko tenperatura honeetatik babesteko edo arintzeko eta tenperatura horreek osasunean izan leikiezan eragin negatiboak leuntzeko.
Klima-babeslekuak
Liburutegiak, auzo-etxeak, kirol-ekipamenduak, garraio-geltokiak, museoak, erakusketa-gelak eta merkatal zentroa dira, besteak beste eginkizun hori beteten daben barruko eremuak. Orokorrean, hoztutako eraikinak dira eta ura eta egoteko lekuak izaten dabez freskatu ahal izateko.
Kanpoko klima-babeslekuak uriko ingurune berdeak dira; landaretza eta itzalguneak izatean, pertsonen sentsazio termikoa hobetu egiten dabe, babesleku natural bihurtuz egun sargorietarako. Uribilduan dagozan iturri eta ur-eremuak be egokiak izan daitekez beroari aurre egiteko, freskatzeko eta hidratatzeko.
Leku honeek bereziki baliagarri eta gomendagarri dira ahulenentzat, babesteko eta bero-kolpea saihesteko aukera emoten deutsielako, kasurik larrienetan gorakoak, palpitazinoak, konortea galtzea edo heriotza be eragin leikez-eta, batez be haurren edo pertsona nagusien artean, gaitasun gitxiako izaten dabe eta muturreko tenperaturak jasateko.
Klima-babeslekuen sareko zerrenda.
