Datorren domekaz, azaroak 10, ospatuko dan Eleizbarrutiaren Egunaren atariko lez, gotzainak ‘Nueva Economía Fórum’ dalakoak antolatutako ekitaldian parte hartu eban.
Laburpena_Resumen de la intervención del obispo de Bilbao en @NewEconomyForum @BBK_eus @solaria_energia pic.twitter.com/t1GftjSFsu
— Bilboko Elizbarrutia (@DiocesisBilbao) October 25, 2024
On Joseba Segura gotzainak, besteak beste, Bilboko Eleizbarrutiaren ekonomia eta pastoral jarduera azaldu eban.
Gotzainak azaldu ebanez, Eleizbarrutiak 2023an izan eban aurrekontutik (134 miloe), %8,2 izan zan parrokia jarduerarako, Zatirik handiena (%67), heziketa eta hezkuntzara zuzendu zan. Hamabost miloe (%11,2) izan ziran gizarte ekintzarako, Caritas Bizkaia dalarik arlo horretan jasotzaile nagusia.
Eraikinen inguruko datuak be emon ebazan: “291 parrokia doguz euren tenpluakaz eta 345 ermita, beste sasoi batzuen ikur”. 188 abade dagoz, 43 laiko soldatagaz pastoralgintzan, 9 deiakono eta 5.000 emakume boluntario, “izan be, gehienak emakumeak diralako”.
Sakramentuak
Ehuneko 10 inguru dira domekaz mezetara joaten diranak. Iaz, 1.531 ume bateatu ziran Bizkaian, 2.427 umek egin eban lehenengo jaunartzea eta 452 lagunek sendotza hartu eben.
312 lagun (guztiaren %9) ezkondu ziran Eleizatik.
Zelan finantzatzen da Eleizaren jarduera?
Eleizbarrutiaren heziketa-egintza, itunpeko gainerako hezkuntza lez, diru publikoak finantzatzen da zati baten. Gizarte ekintzari dagokionez Caritas Bizkaia erakundea, lotutako beste erakundeak lez, “bere fondoakaz finantzatzen da eta berariazko egitasmo batzuei laguntzeko administrazinoagaz hitzartutako bitartekoakaz”.
Pastoralgintza bere bitartekoakaz finantzatzen dau gehien bat. Zerga-autorpenean ‘X’ markatzeari dagokionez, “Bizkaian autorpena egiten dabenen %22 inguruk laguntzen deutso Eleizari”.
Erronkak
Bizkaiko Eleizak orain eta etorkizunari begira dituan erronkak aitatu ebazan gotzainak, “etxeko” kudeaketatik kudeaketa “profesionalagora” igarotzea ezinbestekotzat joz. Honen haritik, 40 boluntarioen esku-hartzeaz prestatutako egitasmo estrategiko ekonomikoaz, ekonomia batzordeen bidez lurraldeetan zabaltzen danaz, jardun eban. Osoko kudeaketarako sistema bateratua (ERP), bertan Eleizbarrutiko erakundeen %80 sartuta dagoala agertuz, eta hornitzaileen kudeaketa bateratua nabarmendu ebazan. Aurkezlearen galderari erantzunez, On Joseba Segurak ondarearen kudeaketaz be jardun eban, “kristau alkarteak, berak bakarrik” ezin deutsala eutsi autortuz.
Eleizbarrutiaren Egunerako mezua
Aurtengo jardunaldian, bokazinoan jarri da arreta. Kontu horren inguruan idatzi dau gotzainak Alkarren Barri aldizkarian hilero argitaratzen dan mezuan. Bertan nabarmentzen dauanez, “ez dago besteen gainetik dagoan bokazinorik. Dalako bokazino hori guztion onerako zerbitzutik garatzea da benetan garrantzitsua”.
