Datozan egunetan bisitatuko daben Xabier Goikouria misiolari bizkaitarrak 57 urte daroaz Kongoko Errepublika Demokratikoan. Bere eskutik ezagutu ahal izango dabez, beraz, Likasin eta inguruetan garatzen ari diran egitasmoak: nekazaritza-kooperatiba, amaetxea, ahalmen-urritasunen bat daben pertsonentzako ospitalea…
Eleizbarrutietako Misinoek Lubumbashiko artxidiozesiagaz sinatutako lankidetza-hitzarmenen bidez hemengo misiolariek jardun izan daben lekuak be bisitatuko dabez. LIkasin, Xabierri bisita egiteaz batera, Berrizko Mesedetako Misiolariakaz be egongo dira, eskola-barnetegia zuzentzen dabe-eta bertan eta Bunkeyara joango dira, hainbat espezialitatetan arreta eskaintzen dauan ospitalea kudeatzen daben monja karmeldar misiolariak bisitatzeko. Kansenian, bestalde, monja kaputxinoakaz alkartuko dira. Honeek, besteak beste, egitasmo honeetan dihardue: ospitalea, eskola eta katekesi-heziketarako zentroa.
Batzarra misiolariakaz
Bidaiari ekin aurretik, eguaztenez, On Joseba Segura gotzaina, sasoi batean ala bestean, asko eta asko denpora luzez, Kongoko Errepublika Demokratikoan izan diran misiolariakaz alkartu zan. Gotzainak zuzenean ezagutu eban herrialde haretan egin izan daben lana, datozan egunetan aurkituko dauanaren aurrerapen.
