Hiru lagun solasean euskerari eta Eleizari buruz, Eleizbarrutiaren 75. urteurrenean

Ander Manterola, Benito Ansola eta Jose Felix Zamakona abadeek Alkarren Barri aldizkariak, Bizkaia Irratiagaz batera, antolatu eban mahai-inguruan parte hartu eben. Euskeragaz eta euskal kulturagaz konprometitutako hiru abadeok Eleizari dagokionez gizartean gertatu diran aldaketen inguruan jardun eben. Bizkaia Irratiko zuzendari dan Javi Onaindiak moderatutako solasaldian, etorkizuneko alkarteari begira be jarri ziaran eta "txikiagoa, beroagoa, sutsuagoa eta sendoagoa" izango dala esan eben. Gaur, Euskeraren Nazinoarteko Egunez, komunikazinorako sailak solasaldi horren bideoa aurkeztu dau.

Euskeraren Nazinoarteko Egun honetan aurkeztu da ibilbide luzea daben hiru abadeon arteko solasaldiaren bideoa. San Bizente abade-etxean grabatu zan.

Eleizbarrutiaren 75. urteurrena dala-eta, Ander Manterola Labayru Institutuaren fundatzaile eta antropologoak, Benito Ansola Lekeitioko parroko ohi eta Euskal Zinema Bileraren sortzaileak eta Jose Felix Zamakona Labayru institutuan irakasle izandakoak barriketan jardun eben hainbat alderdiri buruz. Eleiz probintziari, gizarte sinisteduna sekular bihurtzeari, Eleizan erabilten dan euskerari… buruzko ikuspuntua eskaini eben.