Bilboko Eleizbarrutian hasi barri dogun kurtsoari hasiera emoteko, hilaren amaieran ekitaldi ofiziala ospatuko da Bizkaiko Eleizarentzan esanguratsua dan eraikinean, Deroplp Zentrumen.
Bilboko Eleizbarrutiko abadegaiak hezi ziran eraikin honetan urte luzez. Seminario bi egozan eta 1961ean inauguratutako kapera nagusia. Jose Maria de la Vega arkitektoak eban egitasmo zabalagoaren ondorio izan zan kapera hau.
Arte-adierazpen modernoari erantzuten deutsen beirateak ditu. Beirate horreen zirriborro gehienak Eleiz Museoan arte garaikideari eskainitako aretoan dagoz.
Jose Maria Muñozek egindako beirate honeez gain, altzariak, Pares eskultorearen kurutze-bidea eta hil barri dan Vicente Larrea eskultoreak egin eban eta absidea errematatzen dauan San Pauloren eskultura.
Eraikin historikoa
Seminarioetako bat 1974ra arte egon zan zabalik; orduan lekualdatu egin eben eta eraikinean ikastetxea zabaldu zan.
Gaur egungo eraikinean hainbat enpresa eta Eleizbarrutiko zenbait erakunde dago. Irailaren 28an, bisita gidatuak egingo dira honako erakundeetara: Artxiboa, liburutegia, Labayru Fundazinoa eta Begoñako Andra Mari Unibertsitate Eskola (BAM). Kanpoaldean, Bizkaiaren ingurumenaren aldeko konpromisoa erakusten dauan Adiskidetasunaren basoa dago.
Ospakizuna eta jolas-jarduerak
Irailaren 20a da ekitaldian izena emoteko azken eguna. Gaur arte, 200 lagun inguruk emon dau izena.
Ekitaldia goizeko 10:00etan hasiko da eta 14:00etan Seminarioko frontoian egingo dan lunchak emongo deutso amaiera. Ahalik eta lagun gehiagok parte hartu daian, bikaritzetan autobusak jarriko dabez.
Ezustekoak eta estreinaldiak
Barritasunetako bat, logo barria da. ‘Goazen!’ ekitaldian “bizia hartuko dau”, lagun askoren eskutik. Gainera, lehenengo aldiz honako ekitalditan, ‘txiki-gunea’ atonduko da familiek parte hartzeko aukera izan daien.
Beste alde batetik, Xabi Aburruzaga trikitilariak urteurrenerako beren-beregi konposatu dauan abestia estreinatuko da. Letra Javier Onaindia Eleizbarrutiko irratietako zuzendariarena da eta Naiara Trifol abeslariak zuzenean abestuko dau.
Eleizbarrutiaren 75. urteurrena ospatzeko ekitaldien sustapenaz arduratzen dan taldeak eta ‘Goazen!’ ekitaldirako batzorde teknikoak ezustekoren bat eskainiko deutse, “opari moduan’, kurtso hasierako ekitaldira joan daitezenei.
Gotzainaren deia
Atzo, Radio Popular-Herri Irratian On Joseba Segura gotzainari alkarrizketa egin eutsen eta ekitaldian parte hartzeko dei egin eban, “etorkizunari begiratuz, askatasunez eta ikuskera barriaz”.
Azoka eta BizkaiBira
Kurtsoan zehar, beste ekitaldi nagusi bi izango dira Eleizbarrutian: azoka, BECen, maiatzean, eta ibilaldia oinez, lurralde osoan 19 etapa burutuz, udan (ekaina-uztaila).
