‘Mufungaren Adiskideak’ Fundazinoa Bilbon soru zan. Lekuko fundazinoa, “Association Les Amis de Mufunga” deitzen da eta makina bat kongoarrez osatuta dago. Alkarte biek bat eginda, Mufungako herritarrei giza garapena eta garapen espirituala jadesteko bideak jarten saiatzen dira.
Mufungan, gotzainak, egunero lez, Eukaristia ospatu eban. Iriartek azaldu dauanez, “gaztelaniaz egin eta frantsesera itzulitako homilia kenduta, meza lekuko hizkuntza dan Kisangeraz ospatu zan. Aurreko egunean prestatu eban Mufungako parrokoagaz, irakurten ebana hitz-jarioz eta doinu egokiaz adierazoteko. Kisangera, hain zuzen, idazen dan lez irakurten da eta bokalak bardinak dira espainieran lez”. Gauza bera egin eban LIkasin swhilieraz eta Kansenian kinsangeraz.
Hainbat bisita
Mufungan, ospitalea bisitatzeaz gainera, fundazinoari laguntzen deutsen emakumeen talde biren -Maman Catholiques eta Twende Nbele- esker ona jaso eben. Talde bi honeek ahuleziazko egoeran daagozan pertsonen gizarte sustapenerako lanak egiten dabez. Emakumeek eurek beren-beregi jositako alkandora oparitu eutsen gotzainari.
On Joseba Segura gotzainak eta Iñigo Iriartek beste bidelagun bat be badabe bidaiaren zati gehienetan, hain zuzen be, Margarita Robles venezuelar hirugarrendar kaputxinoa, Lubumbashin dagoana eta orain Kanseniara bialdu dabena.
Mufungako barriei lotutako azken argazki honetan. Association Les Amis de Mufunga alkarteko batzordeek esker oneko ekitaldia antolatu eutsen. Luis Mari Gerrikagoitia bizkaitar misiolariaren eskutik orain dala 27 urte bekak jasoten hasi ziran eta handik hona makina bat pertsona izan da laguntza horreen onuradun eta denporaldi horretako hainbat lagunen lekukotasunak entzun ebezan. Sasoi haretan unibertsitateko ikasketak hasi ebezanak, doktore, psikologo eta irakasle dira gaur egun. Heziketa, giza garapenerako zutabea da.
