Datorren barikuz, herri erlijiositatea eta kultura batuko dira Urkiolako santutegian eta ingurune natural bikainean. San Antonio eguna dala-eta, goizeko 10:00etatik 13:00era ospatuko dira mezak. Alex Alonso lurralde bikarioa buru dala ospatuko dan Meza Nagusia eguerdiko 12:00etan izango da.
Ospakizunetan, gogoan izango dabe Antonio Madinabeitia misiolaria bere heriotzaren urteurrenean.
Azoka
Santutegiaren inguruan, nekazari-produktuak eta abereak batuko dira, 40 ekoizle eta artisaugaz eta 130 abelburugaz, 10:00etatik 15:00ak arte. Askotariko produktuak eskuratu ahal izango dira: gazta, eztia, ogia, ortuariak, frutak, kontserbak, frutu lehorrak eta pateak, besteak beste.
Trikitilariek eta Sustrai Colina eta Anjel Mari Peñagarikano bertsolariek girotuko dabe eguna. Azken honeek, 12:00etako Eukaristian be kantatuko dabez bertsoak
Arratiako errogatiba
Ekainaren 14an ospatuko da lehenengo errogatiba, Arratialdekoa. Oraintsu arte, Aramaiok emoten eutsan hasiera denporaldiari.
Errogatibak goizeko 6:00etan urtengo du Dimatik eta 7:30etan Zeanuritik. Mezea, Xabier Eskauriatza buru dala, goizeko 11etan izango da.
Errepikapena
Ekainaren 15ean, domekaz, errepikapena izango da, barikuko egitarauaren antzekoagaz: baserriko produktuen azoka eta mezak 10:00etan eta 12:00etan.
Herri kirolen erakustaldia be izango da: Malen Barrenetxea, Nerea Arruti, Hodei Ezpeleta eta Bihurri aizkolariak; Sara Asenjo harrijasotzailea, ingudea altxatzen eta txingak eroaten ibilten dan Ainhoa Larrinoa, Iparraldeko jokoak Karlos Aretxabaletaren eskutik. Arratsaldez, erromeria izango da Aiko taldeagaz.
Abadiñoko Udalak, Urkiola Landa-eremuaren garapenerako alkarteak, Urkiolako santutegiak eta BBK erakundeak babestu dabe jaialdiaren antolaketa.
Autobusak doan
Urkiolara joatea errazteko, Bizkaiko Foru Aldundiak autobusak jarriko ditu doan ekainaren 13 eta 15ean. Zelaietan (autobus-geltokia) atarako dira 9:00, 10:00 eta 11:00etan, eta Traña-Matienan (eskolen aurrean) geldialdia egingo dabe. Bueltako autobusak 17:00etan eta 18:00etan atarako dira.
