Barriak

Datorren domekaz, abenduak 8, Sortze Garbiaren Egunez, Eleizbarrutiko Seminarioaren eguna ospatuko da. Ignacio Fernandez errektoreak adierazo dauanez, "aukera ona da otoitz egiteko, esker ona adierazoteko eta eskaria egiteko mahastizainari, abadegaiak bialdu eta gidatu daizan eta euren euskarri eta bidelagun izan daiten".

Abenduaren 3an, martitzenez, ospatu zan San Frantzisko Xabier misinoen zaindariaren eguraren inguruan, Misino-heziketarako Madrileko Eskolako 16 ikasle erromes joango dira Xabierrera (Nafarroa) asteburu honetan (abenduak 7 eta 8).

Gaur ospatzen dogun Boluntarioen Nazinoarteko Eguna dala-eta, gotzainak mezua idatzi deutse askotariko erakundeetan boluntario lez jarduten daben 5.000 lagunei. On Joseba Segura gotzainak "bihotzez" eskertu deutse "Bizkaiko Eleizaren eta gizartearen aldeko, konpromiso, eskuzabaltasun eta zerbitzua". Alkartearen izenean, "Barri Onaren poza eroanez eta gizarte bizi eta solidarioagoa eraikitzen lagunduz" egiten daben ekarpenagaitik.

Oroimenaren Egunaren eta laster ospatuko dan Giza Eskubideen Egunaren harira, xede politikoko indarkeriak Euskadin eragin izan dauan zenbait biktimak bere lekukotasuna eskaini eban atzo, Begoñako Andra Mari Irakasleen Unibertsitate Eskolan (BAM).

Gaur arratsaldez, "Gazte Role Model" sariak banatuko dira Begoñazpi ikastolan. Sarien XV. ekitaldian, Rakel Mateo bizkaitar triatloilariak eta Aitor Alapont enpresariak jasoko dabez autorpenak. Lehenengoa, hamargarren postuan geratu zan Parisen ospatu diran olinpiadetako paratriatloian eta bigarrenak P4Q bizkaitar multinazionala fundatu dau beste batzukaz batera. Euskadiko heziketa-arloari lotutako sari hnen bitartez saritu bieh gizarte konpromisoa eta jardun profesionala autortzen da, ahalegin eta hobetzearen eredu lez aurkeztuz ikastetxeko ikasleei. 

Ander Manterola, Benito Ansola eta Jose Felix Zamakona abadeek Alkarren Barri aldizkariak, Bizkaia Irratiagaz batera, antolatu eban mahai-inguruan parte hartu eben. Euskeragaz eta euskal kulturagaz konprometitutako hiru abadeok Eleizari dagokionez gizartean gertatu diran aldaketen inguruan jardun eben. Bizkaia Irratiko zuzendari dan Javi Onaindiak moderatutako solasaldian, etorkizuneko alkarteari begira be jarri ziaran eta "txikiagoa, beroagoa, sutsuagoa eta sendoagoa" izango dala esan eben. Gaur, Euskeraren Nazinoarteko Egunez, komunikazinorako sailak solasaldi horren bideoa aurkeztu dau.

Asteburuan zabaldu dabe Begoñako misino-azoka. Basilikako eleizpearen azpian dagozan lokaletan jarri dabe, ohikoa danez, eta abenduaren zortzira arte egongo da zabalik (Ordutegia: 11:00etatik 13:30etara eta 17:00etatik 19:30etara; azken egunean, goizez bakarrik).

Abenduaren 14an, migrazino-gertaeraren inguruko gogoetarako saioa ospatuko da Begoñako Gogarte Etxean, 10:00etatik 14:00etara. Xabier Aierdi soziologoak, Ramón Ibeas teologoak eta Jesús Prieto Deustuko Unibertsitateko antropologia-irakasle erretiratuak parte hartuko dabe. Saioan izena emoeko (bazkaltzen geratuko dan ala ez adierazoz), mezua bialdu helbide elektroniko honetara: bka.euskadi@gmail.com Izena emoteko azken eguna, abenduaren 10a.

Hainbat jarduera ospatu da Eleizbarrutian Abendualdiko lehenengo domekan. Gainera, Ebanjelizatzearen Eleizbarrutiko Egitasmoaren sustapenerako taldeak lagungarriak prestatu ditu, domeketako Eukaristietan, katekesian, ikaxtetxeetan edo erakundeetan lantzeko.

Asteburuan, Ekintza Katolikoko Langile Ermandadea (HOAC) mobimentuak etenbako heziketarako sarrerako ikastaroa ospatu dau Berrizko Mesedetako Misiolarien komentuan. Alde Zaharreko, Barakaldoko eta Errekaldeko militanteek parte hartu dabe Juani Sosa Kanarietako HOAC mobimentuko militanteak gidatu dauan saioan.