Sei urteko lanaren ostean, joan dan astelenez, Alberto Jáimez diakonoak bere Doktorego-tesia defendatu dau.
Bere esanetan, “erronka pertsonala izan da eta aspalditik sartuta neukan orratza atarateko balia izan deust“, baina, gainera, “nire jakin-mina” asetzeko “ihesbidea” izan da.
Gauez prestatu izan dau tesia, diakono lez dolurako pastoraltzan, beilatokietan akonpainamendua emoten egiten dauan lanak horretarako astia itzi deutsanean. Bere ustez, sekretua “diziplinari eustea da eta emaitza Eleizaren aldeko zerbitzua dala sentitzea”.
Ikerketa
Azterlanak, sarritan ateismoari lotuta aurkeztu jakun Carl Sagan zientzialari eta dibulgatzaile ezagunaren lana “teologiaren ikuspuntutik” barriro irakurtea proposatzen dau. Ikuspuntu barritik, Saganek teologia naturalari eta kreazinoaren teologiari egindako ekarpena nabarmendu tau tesian. Zientziaren eta teologiaren arteko hartu-emonerako eremu barria be zabaldu dau.
Carl Saganek teologiari egindako ekarpen horren adibideetako bat esaldi entzutetsu hau da: “izar-hautsa gara izarrei buruz gogoeta egiten”. Gogoeta honek biziaren eta kosmosaren arteko lotura sakona nabarmentzen dau, berez ikerketa zientifikotik sortuta, sakratura gerturatzea dalarik. Lan hau gero eta jarraitzaile gehiago dauan korrontearen barruan dago eta zientzia-ezagutza garaikidearen eta gogoeta teologikoaren arteko loturak ezarri gura ditu miresmen, begiramen eta zentzunaren baterako bilatzearen bidez.
