Kokapen barriari esker, BAMen heziketa-egitasmoa oinarritu egingo da, inguru irisgarriago eta konektatuagoan eta irakaskuntzaren eta ikerketaren arloan gaur egun dituan preminei egokituago dagoan inguruan.
Bilboko egoitzak 1.128 metro karratuko lursaila hartzen dau, 4.000 karratu inguru eraikita eraikin bigaz. Honeek heziketarako erabiltzeko moduan dagoz.
BAMek, 75 urteko ibilbidean, 10.000 ikasletik gora prestatu ditu eta gaur egun 2025-2030 estrategia-egitasmoa garatzen dihardu. Bide-orri hau, heziketa-eskaintzaren egunertzean, ikerketaren bultzaketan eta heziketa-alkarteagazko hartu-emonen sendotzean oinarrituta dago.
Leire Garamendi erakundeko zuzendariordeak azaldu dauanez, “erabaki honek sendotu egiten dau BAMen ekarpena heziketa-sistemari, irakasleen halitatezko heziketa eta gizartearen aldeko konpromisoa bermatuz”.
Deriotik Bilbora lekualdatzeak onurak ekarriko deutsiez ikasleei, irakasleei eta ikerketari, alkarlanerako egokiagoak dira eremu malguago eta argitsuagoak izango dabezalako. Gainera, uriko unibertsitate eta kultur ingurunean txertatzeko aukera gehiago eskeintzen da.
Irakasleen Unibertsitate Eskola
BAM Irakasleen Unibertsitate Eskola eleizbarrutiarena da. Gaur egun, graduak emoten ditu Haur eta Lehen Hezukuntzan eta gradu bikotxa Lehen Hezkuntzan.
Hirurogeta hamabost urteotan, BAM erreferentziazko ikastegia izan da maisu eta andereñoentzat. Bereizgarri izan dau heziketa-sistemagazko lankidetza.
Haur eta lehen hezkuntzan espezializatuta dagoan unibertsitate eskola da. Lotura estua dau heziketa-sistemagaz ikerketa eta jakintzaren zabalkundearen bidez. Era berean, urteotan heziketa-eredu erreferentea garatu dau euskeraren eta euskal kulturaren zabalkundean.
Eleizbarrutiaren egoitzari buruz
Bilboko eleizbarrutiak nabarmendu dauanez, BAM Campo Volantinera lekualdatzeak ez dakarrela aldaketarik Barrainkuan eraiki gura dan egoitza bakarraren inguruan.
Jose Miguel Erdozain eleizbarrutiko gerenteak azaldu dauanez, “BAM lekualdatzeko erabakiak ez dau egitasmoaren aurreikusitako garapena aldatzen”. Bere esanetan, “Sinergiak aprobetxatze aldera, Bizkaiko Eleizaren heziketa, gizarte, kultur eta pastoral zerbitzuak leku berean batzeko konpromisoari eutsi egiten deutsagu”. Dana dala, zera zehaztu dau: “egoera barri honetatik eratorritako ezinbesteko moldaketak egingo dira”.
