Lau abadegaik ekin deutse kurtsoari Bilboko eleizbarrutian: prozesuko lehenengo aldian, dizipulu aldian, dagozan David Rivillas eta Gonzalo Uriartek eta, bigarren aldian, aldi eratzailean, dagozan Lander Basauri eta Cernin Martínezek. Iruñan dihardue heziketa osotzen bertako sei abadegaigaz eta Jakako bategaz batera.
Abadegaien berbak
Ekitaldian, lau abadegaiek hitz egin eben euren heziketa-ibilbidearen inguruko gogoetak batera jartzeko. Iruñako heziketa-aldia nabarmendu eben, oso aberasgarritzat joz. Lauren esanetan, beste errealitate batzukaz eta jatorri desbardinetako pertsonakaz batera bizitzea funtsezko da euren hazkunde pertsonalean eta bokazino-hazkundean.
Errektorea kurtsorako ildo nagusiak aurkezten
Ignacio Fernandez Seminarioko errektoreak aurkeztu ebazan kurtsoan nabarmenduko diran zerbitzuzko ildo nagusiak. Bere esanetan, abadegaiak lehenengo aldiz jardungo dabe ospitaleetan, abade-etxean eta Basauriko kartzelan akonpainamendua eskaintzen. Fernandezen esanetan, “heziketan gizarte pastoraltzaren alderdia sendotzeko apustu irmoa da”. Gainera, aurreko urteetan lez, “ate irekiak” jardunaldiak ospatuko dira -hilaren lehenengo barikuz-, hiru hilez behin pastoral bisitaldiak egingo dira Eleizbarrutiko lurraldeak ezagutzeko, Abenduko koroa ospatuko da…
Abadegaiek datorren zapatuz, irailak 26, ospatuko dan kurtso hasierako ‘Goazen’ ekitaldian parte hartuko dabe.
Aurpegi barriak ekitaldian
Inmaculada Loroño V. bikaritzako pastoral koordinazinorako gotzain ordezkariak parte hartu eban ekitaldian eta, gotzainak eskatuta, bere burua aurkeztu eban bertaratutakoen aurrean. Datozan urteetan Bizkaiko alkarte kideen bidelagun izango diran abadeen perfila ondo ezagutzearen garrantzia nabarmendu eban.
Gotzainaren berbak
On Joseba Segura gotzainak esker ona adierazo eutsen lau abadegaiei euren heziketa-prozesuan erakutsitako konpromisoagaitik. Gainera, Seminarioan lehen urratsak emoten dabezanei harrera beroa egiten jakitea ezinbesteko dala esan eban. Eta beste bide bat hartzen dabenean be -zenbait kasutan gertatu dan lez- errespetuz lagundu behar jakela esan eban.
“Abade izateko prestatzen diharduenen bereizketa eta heziketarako aldi hau horretarako da hain zuzen be, erabakia hartzeko eta ilusionatuta dagozan eta inguruan ilusinoa zabaldu daikien abade izatera heldu ahal izateko”, esan eban gotzainak.
Bilboko seminarioaren inaugurazinoa. Lau abadegai
— @DiocesisBilbao (@DiocesisBilbao) September 18, 2026
Cuatro seminaristas comienzan el curso en el Seminario de Bilbao. #alkartuta pic.twitter.com/NmJYZ8r8iz
