Gabon-aldia amaituta, sinodo-seneko Eleizari lotutako prozesuari ekingo jako barriro be. Esate baterako, meatze-inguruan -II. bikaritza- bideratzaileen batzarra egingo dabe aste honetan.
Izan be, bideratzaile izateko prestatutako 160 lagunak dira aldi honetako eragile nagusiak. Euren lana funtsezkoa izango da eleizbarrutian alkarrizketa sustatzeko eta jentearen parte-hartzea ziurtatzeko. Dalako pertsona horreek berariazko heziketa jaso eben azaroaren amaieran, bakotxak dagokion lekuan gogoeta eragin dagian.
Egiteko honetan laguntzeko, sinodorako eleizbarrutiko taldeak Azken Agiria irakurtzeko “gida” sortu dau. Bertan Sinodoaren laburpen argia jasotzen da eta, gainera, Ebanjelizatzearen Eleizbarrutiko Egitasmoagaz (EEE) dituan loturak agertzen ditu, sinodo-ikuspuntua ohiko pastoralgintzan txertatuz.
Batera bide egiteko deia
Komunikabideetarako eleizbarrutiko sailetik aurkeztutako bideoak agertzen dauanez, alkarte osoaren “ordua da”. Dei egiten jake, beraz, eleiztar guztiei, lagun bakotxaren partaidetza ezinbesteko dauan mobimentuagaz bat egin dabien. Kontua ez da hutsetik hastea, hasita dagoan ibilbidean sakontzea eta urrats zehatzak emotea baino.
Egutegia
Datozan hilabeteetarako ibilbidea:
Parrokia eta pastoral barrutietan (2026ko otsailera arte): Bideratzaileek taldeak batuko dabez Azken Agiriaren inguruan alkarrizketan jardun eta aurreko lanari jarraipena emoteko.
Batzarrak bikaritzetan (2026ko otsaila-martxoa): Gero, bikaritzaz bikaritza egingo dira batzarrak, oinarrizko alkarteetan sortutako gogoetak batera jartzeko eta horreetan sakontzeko.
