Aurreko egunetan, boluntarioek eta egitasmoetan parte hartzen daben lagunek arreta handiz prestatu izan dabe jardunaldia: berbaldiak, zehaztasunak, harrera, entzutea… Azken baten, kanpotik ikusten danaz gainera, jarduera osoaren euskarri dana agertzera emon gura izan da: hurkotasuna, irakasteko pazientzia, laguntzeko samurtasuna, altxatzeko iraunkortasuna eta kristau alkarte txiki eta zahartua, Jesukristo lehenesten dauan eta egitasmoari eusten deutsan alkartea.
Maria (boluntarioa eta Caritaseko Erandioko arduraduna) eta beste asko arduratu da lan honetaz eta egun berezi hau antolatzeaz, eskuzabaltasunez eta prestasun handiz. Bisitari bakotxak -herri agintariak, Cáritas Bizkaia erakundeko ordezkariak, bikaritzako ordezkariak, herriko alkarteak, Jado-Compasión ikastetxeko ikasleak, parrokietako gazteak- zerbitzari dan alkartea aurkitu eban eta, horrezaz gain, sufritzen dagoanagaz itxaroten dauan, bilatzen ari danabaz bide egiten dauan, apaltasunez eta pozik eusten dauan alkartea.
Bisitariek koadernoan idatzitako lekukotasunek miresmena, esker ona eta egitasmoaren giza alderdiak eta alderdi espiritualak eragindako harridura agertzen dabe. Caritas zerbitzuen sarea baino gehiago dalako: entzun egiten dauan, erantzun egin gura dauan, makal eta leial, apal eta presente, iraun egiten dauan Eliza da.
“Jardunaldian, aurkezpenetik edo alkarregaz hartutako kafetik harago, itxaropenari aurpegia ipini deutsagu. Caritasek emoten dauzn zerbitzua, egitura inpertsonalen egintza ez ezik, Barri Onaren indarrean eta lagun bakotxaren duintasunean sinisten daben emakume eta gizonen egintza dala erakutsi dogu. Gaur, alkarte lez, hauxe dinogu apaltasunez eta uste osoz: Eleiza gara, itxaropena gara, bidelagun gara”.
