Gaur goizez, Ereñoko Gabika auzoko eleizako erloju zaharbarrituaren bedeinkazinoa egin da. Hildakoen eguneko mezan buru izan dan Bilboko gotzainak bedeinkatu dau konpondutako makineria.
📌Erabarritutako erlojuaren inaugurazinoa eta bedeinkazinoa.
— Bilboko Elizbarrutia (@DiocesisBilbao) November 2, 2023
Bendición del reloj restaurado de Gabika (Ereño) pic.twitter.com/rJn3Srrdbg
1889an erlojua eraiki eban Benito Yeregui erlojugilearen birbilobak parte hartu dau makineriaren zaharbarritzearen aurkezpenean. Xabier Yereguik esker ona adierazo dau Eleizbarrutiaren, Ereñoko udalbatzaren, parrokiaren eta Somorrostro ikastegiaren -berau arduratu da zaharbarritzeaz- esku-hartzeagaitik. 2019an ekin jakon prozesuari, baina pandemia zala-eta, gaur arte luzatu da.
📌Gabikako erloju zaharbarrituaren egilearen biloba. Mikel Yeregui, erlojuaren ezaugarriei buruz. pic.twitter.com/VjCAaTZ7r2
— Bilboko Elizbarrutia (@DiocesisBilbao) November 2, 2023
Gaspar Martinez Kultura eta Ondarerako Bilboko Eleizbarrutiko arduradunak kanpantorreetako erlojuek gure kulturan daben garrantzia azaldu dau: “Antzinako burdinolen ondorengo izan ziran galdategiak garatu ziranean, urrats asko emon zan industrializazinoaren aukeretara moldatzeko. Horren adierazle dira, besteak beste, erloju honeek. Pertsonen bizitzaren erritmoa markatzen eben. Aurretik eguzki-erlojuak egozan herri askotan; beranduago, makineria eben erlojuak eraiki ziran eta eurok iragarten ebezan, kanpaiakaz batera, herrietako jaiotzak, heriotzak edo larrialdiak”.
📌Gaspar Martinez ondarea eta kulturaren Eleizbarrutiko arduraduna Gabikako erlojuaren zaharbarritzeaz. “Erlojuek eta kanpaiek beti markau dabez gure herri txikietako erritmoak” pic.twitter.com/oIujP5lOJd
— Bilboko Elizbarrutia (@DiocesisBilbao) November 2, 2023
Aingeru Merikaetxebarria Gabikako parrokoak eskerrak emon deutsaz parrokia alkarteari egitasmo hau bultzatzeagaitik. Gainera, bide batez, eleiza pintatu egin da, izan be, nahiz eta balio historiko handirik ez izan, “balio sentimental eta erlijioso handia dau” bertako auzotarrentzat.
Erlojuaren konponketaren aurrekontua 8.000 euro ingurukoa izan da. Zati bat udalak ordaindu dau eta gainerakoa, fundazino pribatu batek.
