Irudia joan dan ekainean aurkitu eben XX. gialdiaren erdialdetik jausteko zorian dan tenpluan eta benetan une zirraragarria izan zan taldekideentzat.
Ikerketa-lanetan baieztatu eben eskultura Jose Larrea Larrea bilbotar eskultoreen leinu entzutetsuko kidearena zana. Larreatarrek hainbat artelan egin izan dabe Bizkaiko esparru erlijioso eta eskultorikoan.
Jose Larrea
Jose Larrea, eskultore bizkaitar entzutetsua izan zan, artisten leinu ospetsukoa. Bere aita, Vicente Larrea Aldama (1852-1922) izan zan, familiako lehenengo eskultorea eta Bilbon eben tailerraren fundatzailea eta modelaketa- eta marrazketa-irakaslea Arte eta Ofizioen eskolan.
Aitaren tailerrean eta Pariseko Arte Ederren Eskolan hezi eta trebatu zan. Parisen bizi izan zan bederatzi urtez eta berak sartu ebazan Espainian Maumejean frantziar etxearen beirateak. Etxe honek ordezkaritza zabaldu eban beranduago Donostian.
Berrogeta hamar urtez egin eban lan familiaren tailerrean, imajinagintza erlijiosoan espezializatuz. XX. gizaldiko imajinagin nabarmenetakoa izan zan Espainiako iparraldean.
Ezagunak dira, besteak beste, bere lanok: monumentua Samaniegori Guardian (1883), Samguesako Jesusen BIhotza, Loiolako San Inazioren irudia jesuiten Iruñako ikastetxean, Algeciraseko Nazaretarraren kofradiaren Fedearen Kristoa (1938), eta Monumentua Remigio Vilariñori Bilbon (c. 1955). Badira beste lan batzuk be Bizkaian, Nafarroan eta Espainiako beste zenbait lekutan.
Pilar Gayarre nafarragaz ezkondu zan eta Vicente Larrea Galbete eskultorearen aita zan. Honek jarraipena emon eutsan familiaren arte-legatuari, eleiza, ikastetxe eta eremu publiko askotan ikusi daitekelarik.
Museoko taldeak adierazo ebanez, “eskualdeko fede eta arte erlijiosoaren lekukotasun bizia da”.
Hasierako ebaluazinoaren ostean, Eleiz Museora eroatea erabaki eben, hobeto zaintzeko eta ikertzen jarraitzeko.
Eskulturaren lekualdaketa
2025eko urriaren 7an, bilduma-teknikoez, zaharbarritzaileez, mantentze-lanetan aritzen diranez eta eleizbarrutiko kideez osatutako taldeak arrakastaz burutu eban eskulturaren lekualdatzea.
Gaur egun, aingeru guardakoa museoko zaintze-sailean dago eta bertan garbitu eta dokumentatu egingo dabe.
Zaharbarritu ondoren, behin betiko kokapena zehaztuko da, klaustroan edo erakusketa-aretoren baten, historiaz eta sinbolismoz betetako pieza hau ikusgai egon daiten.
Bilboko Eleiz Museoa
Bilboko Eleiz Museoak Bizkaiko ondare erlijiosoa zaintzeaz, ikertzeaz eta zabaltzeaz arduratzen da.
Uriburuaren bihotzean kokatuta, Museoan bilduma garrantzitsua -eskulturak, margolanak, urre-zidargintza…- gordeten dabe. Erdi Arotik hasi eta XX. gizaldira arteko lanak dagoz. Bere lana funtsezkoa da pieza hau lako artelanak berreskuratzeko eta euren garrantzia nabarmentzeko, lurraldearen oroimen eta nortasun kulturalaren isla dira-eta.
Aurkikuntza honek eleizbarrutiko ondarea gordetzeak dauan garrantzia nabarmendu dau beste behin be.
