Noticias

Eleiz Artxiboaren zuzendariak, Anabella Barrosok eta Cristina Castillok, bertako  teknikariak, hartuko dabe parte gaur eta bihar Madrilen Gotzain Konferentziako Ondare Kulturalaren azpibatzordeak eta Espainiako Eleizearen Artxiboetako Alkarteak eratutako jardunaldi teknikoetan. Praktika onak alkarbanatuko dabez, besteak beste, egun biko topaketa honeetan, baina horrez ganera, teknologia barriek eta adimen artifizialak eskaintzen dauazan aukera parebakoak be izango dabez aztergai.

Justizia eta Bakerako Batzorde Nagusia Arma Nuklearrak Deuseztatzeko (ICAN) Nazinoarteko Kanpainaren barruan dago 2018tik, eta laguntza eskatzen deutse Arma Nuklearrak Debekatzeko NBEaren Hitzarmenari. Gutun irekia eta konpromisoa idatzi dabez sinatzeko (gutuna edo konpromisoa edo biak) eta kopia juspax@juspax-es.org helbide elektronikora bialtzeko. Gainera, konpromiso hau kristau alkarteetan sustatzea be gurako leukie.

Pili Castro, Caritaseko Nagusien arloko arduradunak berbaldia emon dau asteon Gernikan bakardadea dala-ta. Gaixoaren Pazkoa ospatuko da domeka honetan eta horri begira, Bizkaiko pastoral barruti baten baino gehiagotan honen inguruko ekitaldiak antolatzen dihardue. Castro Bizkaia Irratian martitzenero Eleizako gaiei eskaintzen deutsen tartean egon da eta arazo honen inguruko zehaztasunak emon dauz.

Bihar ospatuko da Jesusen Mirabeen jai liturgikoa. On Joseba Segura, meza burua izango da goizeko 10:30etan hasiko dan eukaristian, monjen jatorrizko etxean (Naxa, 1). Vatikanoak euren jubileu-urtea urtebetez luzatzeko aukera emon deutso ordenari eta 2022.eko uztailaren 25era arte ospatuko da.

Eguenean hasi eta barikura arte, Eleizearen jasangarritasunaren inguruko jardunaldietan hartu dau parte Bilboko Eleizbarrutiak Madrileko Gotzain Koferentzian eratutako jardunaldietan. On Joseba Segura da arlo honetako gotzain arduraduna eta berari egokitu jako saioei hasierea eta amaierea emotea. Bestalde, Bilboko Eleizbarrutiaren lan pastoraltzako ordezkaritzea egon da Madrilen sindikatuetan parte hartzen daben kristinauen esperientzak alkarbanatzen. Bilbon, zapatuan, gazteen topaketea egon zan eta lekukotza ezbardinak entzun ziran. Gazteentzako lan kanpamentua egon da kartzela barruan be …

Ekainaren 20, 21 eta 22rako Konpostelako Santiagorainoko erromesaldia antolatu dau arlo hau daroan Eleizbarrutiko esparruak. Tokia mugatua danez, interesa daukanak ahalik eta lasterren izena emon daiala aholkatzen dau arduradunak, Patxi Malok. Bidaia autobusez izango da eta azken etapa oinez egiteko aukerea egongo da.

Astean zehar webgunean argitaratutako barri nagusiak laburbilduta eskaintzen deutsuguz. Bizkaiko Eleizan asko dira aurrera eroaten diran ekimenak eta webgunean euron arteko batzuk baino ez dira batzen. Zure parrokian, erakundean zein eleiz alkartean gertatzen danaren barri emoteko helbide honetara idatzi zeinke: komunika@bizkeliza.org

Bihar eta hurrengo bi domekatan be Errigoititik, Idibaltzagako Andra Mari eleizatik eskainiko dau mezea Euskal Telebistako lehenengo kateak. Euskal Herriko lurralde ezbardinetatik emititzen da eukaristia domekero eta oraingoan Bilboko Elizbarrutiari egokitu jako koordinazinoa. Meza aurreko lokuzinoa, Bizkaia Irratiko Miren Ezkurra esatariak egingo dau, batzarburua Carlos Olabarri parrokoa izango da eta Liturgiako kantuetan parrokiako koruak lagunduko dau. 

Bihar, Begoñan ospatuko dan gazteen topaketan misinoaren, alkartasunaren eta partaidetzaren inguruko hainbat lekukotasun entzungo da.