Barriak

Inguruan sustraituta dagoan ohiturari jarraituz, fededun ugari batuko da gaur be Karrantzako El Sucesoko Andra Mari santutegian beronen eguna ospatzeko. Lehenengo meza 8:00etan izango da eta, ondoren, 10:00, 11:00 eta 12:00etan (Meza Nagusia Sergio Buiza lurralde bikarioa buru dala eta Abesti Lagunak abesbatzak girotuta) izango dira eleizkizunak.

Euren monasteriotik Wuhurako (Txina) hartu eban lehenengo espedizinoaren mendeurrena ospatuko dabe zapatuz, irailak 19, Berrizen. Bihar, irailak 18, Taiwan, Japonia eta Mikronesiako hiru lekaimek jardungo dabe esperientzien mahaian, mendeurrenaren hasierako ekitaldiaren bezperan.

Bilboko eleizbarrutiak bat egingo dau Ondarearen Europako Jardunaldiakaz. Aurton, 26. ekitaldia ospatuko da Bizkaian eta doako 270 kultur proposamen garatuko dira 77 udalerritan, 172 erakunderen -alkarteak, museoak eta udalak- eskutik. Eleiz Museoak, Eleizbarrutiko Artxiboak eta hainbat parrokiak be parte hartuko dabe kultur ondarea herritarrei hurreratzeko xedez ospatzen dan jardueran. 

Datorren asteburuan,Euskalerriko Eskautak Bizkaia (EEB) mobimentuko begirale boluntarioek taldeen gaur egungo errealitatearen inguruan gogoeta egingo dabe Derion kurtso hasierako jardunaldietan.

Imanol Elola eta Aitor Esteban Perura joan dira. Irailaren amaierara arte egongo dira herrialde haretan misino-ibilbide luzea daben pertsona biok. Imanolek orain dala hamar ute inguru ekin eutson ibilbide horri Ipar-Hegoaldea ikastaroa egin (2012-2013) eta gero Ekuador, Mozambike eta Ghanan egon zanean. Aitorrek hiru urte emon ebazan El Salvadorren eta hamabost Trujillo Garaian (Peru). Aitorrek Trujillo Gariko lehenengo parrokiaren, Jesus Solidario parrokiaren, 20. urteurrena ospatzeko ekitaldietan parte hartzen dihardu, bera inguru haretan egon zanean inauguratu eben-eta.

Joan dan asteburuan, iparraldeko senegaldar alkarteak kultur ekitaldia ospatu dau Durangon. Partaideen esanetan, "gure oroimenean gordeko dogu bategite, senidetasun eta alkartasunezko jarduera lez". Kerman Lopez bikario nagusia, Carlos Olabarri IV. bikaritzako lurralde bikarioa, Marije Calvo Migratzaileen aldeko Pasatoral arloko arduraduna eta Txomin Alonso abadea izan ziran ekitaldian. Beste alde batetik, urperatutako Ama Birjinaren 63. urteurrena ospatu zan Gaztelugatxeko San Joan ermitaren inguruan.

Bilboko eleizbarrutiko Seminarioak Loiolako santutegian erretiroa eginez ekin deutso 2026-27 kurtsoari. Gure eleizbarrutiko eta Iruñako eleizbarrutiko abadegaiek parte hartu dabe gogo-jardunetan, "otoitz, senidetasun eta alkartasun giroan, aldi barriari ilusinoz eta gogotsu ekiteko". Kurtsoaren hasiera ofiziala barikuz, irailak 18, izango da Seminarioaren egotzan (Zabalbide, 92), 18:00etatik aurrera. 

Gernikako Andra Mari parrokiatik emongo dabezan Eukaristietan, Jesus Llarena parroko eta Liturgiarako ordezkaria izango da buru. Parrokiako abesbatzak girotuko dau liturgia. Bihartik aurrera, lau domekatan.

Bilboko eleizbarrutia prest dago 2026-2027 kurtsoari hasiera emoteko. Irailaren 26an, zapatuz ospatuko da Goazen ekitaldia Durangon, Bizkaiko parrokia, mobimentu, alkarte eta beste hainbat errealitatetatik joandako mila lagun inguru batuta.

Bilboko eleizbarrutiko Gotzain Kontseilu zabalak 2026-27 kurtsoko lehenengo saioa ospatu dau gaur, Begoñako gogarte etxean. Bikarioek fede-autormena eta karguen zina egin dabe, besteak beste Felix Alonso kantzilerrak parte hartu dauan ekitaldian.