Barriak

Otsailaren lehenengo asteburuan, neguko egutegian entzutetsu eta herrikoi diran hiru jai ospatu daira: Barikuz, Kandelerio eguna, zapatuz, San Blas eta atzo -otsailak 4, domeka-, Agate Deunaren egunaren bezpera. Gaur ospatzen da santaren eguna eta atzo makina bat lagun ibili zan kalez kale hari abestuz. Barikuz, ohikoa danez, Biziera Sagaratuaren Eguna ospatu zan. Gainera, oroimenezko ekitaldia ospatu da eskolapioen ikastetxean eta hainbat jarduera solidario:

Joan dan zapatuz, otsailak 3, On Joseba Segura Eleizbarrutiko gotzaina buru izan da Mario Fernando Diaz Bravo eta Gorka Campos Saez de la Fuenteren diakonogintzan, Begoñako basilikan. Eleizkizuna zuzenean emon zan. Argazkiak: hemen.

Otsailaren 1ean -eguena-, Errekaldeko Ekintza Katolikoko Langile Ermandadeak (HOAC) mahai-ingurua ospatu eban Errekaldeko Auzo-etxean, auzoan askotariko arloetan jarduten daben lau erakundek parte hartu ebelarik: Arraizpe Pastoral Barrutiak (PB), Gazte Lekuk, Iturri Gorri Kirol Alkarteak eta Errekaldeberriz auzotarren alkarteak. HOAC Bizkaiak "Kristau espiritualtasuna eta mistika Eleizan eta HOACen" ikastaroa ospatu dau Begoñako Gogarte Etxean, Joaquin Sanchez mobimentuko Murtziako Eleizbarrutiko kontsiliarioak lagunduta. 

Usadioari eutsiz, Agate Deunaren jai liturgikoaren bezperan, ehunka koru ibili zan atzo kalez kale Bizkaiko herrietan santari abestuz. Agate Deunaren irudia Eleizbarrutiko 25 parrokiatan irudikatuta dago. Kastrexanan mezak ospatuko dira gaur, 10:00etan, 11:00etan, 12:00etan eta 13:00an.

Astean zehar webgunean argitaratutako barri nagusiak laburbilduta eskaintzen deutsuguz. Bizkaiko Eleizan asko dira aurrera eroaten diran ekimenak eta webgunean euron arteko batzuk baino ez dira batzen. Zure parrokian, erakundean zein eleiz alkartean gertatzen danaren barri emoteko helbide honetara idatzi zeinke: komunika@bizkeliza.org

Gaur eguerdiko 12:00etan, Mario Fernando Diaz Bravo eta Gorka Campos Saez de la Fuente diakono ordenatuko dira Begoñako basilikan. On Joseba Segura Eleizbarrutiko gotzaina buru dala ospatuko dan eleizkizuna zuzenean emongo da hemen.

Gaur, otsailak 2, Jaunaren Aurkezpenaren eguna, Biziera Sagaratuaren Munduko XXVIII. Eguna ospatzen da. Bizkaiko 970 lekaide eta lekaimek euren eguna ospatuko dabe. CONFER Bilbaok antolatuta, Eukaristia ospatuko da, On Joseba Segura gotzaina buru dala, arratsaldeko 19:00etan, Jesusen Bihotza eleizan (Bilboko Ayala kalea, jesuiten egoitza). Bilboko Eleizbarrutian, emakumeen 86 komunitate dagoz eta gizonen 40 komunitate. Gehienak, hain zuzen be 65, uriburuan dagoz. Biziera sagaratua hainbat eremutan agertzen da: ikastetxeak, gizarte ekintzarako egitasmoak, nazinoarteko lankidetza, e.a.

Gaur, otsailaren 1ean, Bilboko Koral Elkarteak gotzainari eroan deutso `Kanta dagigun danok´ kantu sortaren hirugarren alea. Aurreko albumetan gertatu zan moduan, oraingoan be, grabazinoak Deustuko Unibertsitateko kapera gotikoan egin dira. Enrique Azurzaren zuzendaritzapean 50 kantarik hartu dabe parte proiektuan. Eurekin batera, Josetxo Brey bakarlariak eta Alberto Saez Puente, Gorka Iglesias eta Xabier Arana organo joleak. Azken honek aholkulari lanak egin dauz. Proiektua amaitzeko beste hiru diska gehiago kaleratuko dira. Era horretara, egutegi liturgikoa osotuta geratuko da.

Javier Novo Kontserbazino eta Ikerketarako Bilboko Arte Ederren Museoko koordinatzaileak berbaldia eskainiko dau gaur, 19:00etan, Bilboko Eleiz useoan. Otsailaren 29ra arte luzatu dan "Sorolla eta erlikiak" erakusketaren haritik programatutako jardueretako bat da. 

Gaur argitaratu da hasi barri dogun hilari dagokion Alkarren Barri - Comunicación aldizkariaren alea multimedia edukiagaz. Azalean, 300 zenbakia osotzen daben hiru globok gaur kaleratu dan alearen zenbakia gogoratzeaz gainera, begirune eta esker ona adierazo gura deutse orain dala 34 urte lehenengo harria jarri eben eta gaur egun egitasmoari eusten deutsen norbanako, erakunde eta iragarleei.