Eleiz erakundeari eta Ingeteam enpresari emongo deutse Arizmendiarrieta Sariak Bizkaia 2023 autormena, Deustuko Unibertsitateko CRAIn ospatuko dan ekitaldian. Egun horretan, hain zuzen be, 109 urte beteko dira altarara goratzeko prozesuan dan abadea jaio zanetik.
Bizkaiko hainbat erakunde publiko eta pribatuetako 14 lagunek osotu dabe epaimahaia. Caritas Bizkaia erakundeari dagokionez, zera baloratu dabe: “askotariko egitasmoetan laguntzen diharduen 1.900 boluntario kudeatzeak dakarzan zailtasunak. Horretarako, euren beharrizanetara egokitutako berariazko bitarteko digital ugari garatu izan dabe”.
Juan Manuel Sinde Arizmendiarrieta Fundazinoko presidenteak nabarmendu dauanez, Ingeteam enpresari beste hau autortu jako: “enpresa kudeatzeko era, pertsonak aintzakotzat hartuz eta, zehatz-mehatz, kulturaniztasuna ondo kudeatuz”.
Altarara goratzeko prozesua
2015ean Frantzisko aita santuak Jose Maria Arizmendiarrieta abadea Beneragarri izendatu ondorengo urratsak -dohatsu egitea- “zientziaren azalpenetik harago dagoan aparteko gertaera behar dau”, Dino J.M. Sindek.
Bere izena daroan Fundazinotik etenbarik dihardue haren irudi eta legatuaren barri emoten. 2025.eko abenduaren 15ean hasiko dira Beneragarri izendatu izanaren 10. urteurreneko ekitaldiak eta 2026.eko azaroaren 19an amaituko dira, bere heriotzaren 50. urteurrenean.
Datorren domekaz, apirilak 21, mezak ospatuko dira Arizmendiarrietaren oroimenez, Markinan eta Arrasaten.
