Benantzi Bilbao jaialdiaren koordinatzaileak eta Javier Artigas zaragozar organistak lau eskutara joko dabe Mundakako organoa, errepertorio sinfonikoa organo-tutuen bidez interpretatuz.
Ezohiko egitaraua
Hitzordu berezia da, Bilbao bere herrira bueltatuko dalako eta Artigasegaz batera egitarau berezia interpretatuko daualako. Jatorrian orkestrarako pentsatutako pieak interpretatuko dabez lorganoan au eskutara: Maurice Ravelen boleroa, Hans Uwe Hielscherren bertsinoan, eta Chaikovskiren ‘Cascanueces’ ospetsuaren dantza berezien aukera, Alexander Darren transkripzinoan. Orkestrari estu lotuta dagozan partitura biok tutuzko organo historikoaren bidez entzutea esperientzia aparta izango da.
Jesus Guridiren piezak interpretatuko dabez, pieza bi Artigas eta Bilbaoren bertsinoan: El caserio lanaren bigarren ekitaldiaren atarikoa eta Eusko Irudiak. Eszenatokian, Josu Sorriketa -Jose Mari Egileorren ikaslea- be izango da txistua joz, eta Lexuri Urrutiak eta Arantza Fernandesek zuzentzen daben Laspe Mundaka dantza-taldea.
Organoa, Urdaibaiko ondare bizi
Jaialdiaren aurtengo ekitaldia, “Urdaibaiko Organoak eta Ondarea” goiburuaren haritik ospatu da, musikaren, historiaren eta ondarearen lotura estuan arreta jarriz. Musikaren aldetik daben baliotik harago, eskualdeko organoak herrien historiaren lekuko eta tresnaz tresna, organogileen belaunaldiz belaunaldi, eraikitako oroimen kolektiboaren jagole.
Ondarean arreta jarita, jaialdiak, aurton, barritasun bat eskaini dau: Lope Alberdi Recalde Gautegiz-Arteagako organogile eta organoen arloan Euskadin dogun irudi nabarmenaren (1868-1948) inguruko erakusketa jarri da Euskal Herria Museoan.
Eskualdeko eleizak lepo betetzen dira
Benantzi Bilbao jaialdiaren eragile nagusiak Urdaibaiko jentearen garrantzia nabarmendu dau, erruz hurreratzen dira-eta emonaldietara eleiza eta ermitak lepo betez.
Jaialdia natura-erreserbare testuinguruan
UNESCOk 1984an Biosferaren Erreserba izendatu eban Busturialdea-Urdaibai eskualdeko Urremendi Landa-eremuaren Garapenerako Alkarteak antolatzen dau “Joxe Mari Eguileor” Urdaibaiko Organoak jaialdia. Aurton be, eskualdeko organo historikoen soinuak entzun eta Urdaibaiko nortasunaren funtsezko atal dan ondarea aldarrikatu da gaur Mundakan amaituko dan jaialdian.
