Santurtziko San Juan de Dios ospitaleko ‘Hobetu zaindu’ Insititutuko zuzendari dan Jacinto Batiz doktoreak kultura aringarriari buruzko hainbat berbaldi eskain deutse Eleizbarrutiko talde eta parrokiei. Holako ekitaldi baten esan ebanez, gure gizartean, “oso ondo ezagutzen da medikuntzaren kultura prebentiboa eta sendatzailea, baina jenteak ez daki medikuntzaren kultura aringarria zer dan eta nire ustez batera emon beharreko hiru diziplina dira”.
Batizek azaldu ebanez, gaixotasuna prebenitu eta sendatu ezin dogunean, “zeozer egin behar dogu eta orduantxe sartzen da jokoan medikuntza aringarria”. Gai honeen inguruan jardungo dau gaur arratsaldez Areetan, 19:30etatik aurrera.
Batizek azaltzen dauanez, kultura aringarriaz berba egitea funtsezkoa da “herritarrak ahaldundu daitezan eta arreta hau be eskatu daien, gaur egun gure estatuan ez dago-eta bermatuta”.
Bere argitalpen barriaren aurkezpena
Datorren astelehenean aurkeztuko dauan liburua lehen pertsonan idatzitakoa da. Honetan, heriotzaren aurrean dagozan pertsonen zainketea zelakoa izan behar dan azaltzen dau.
Argitalpenaren atarikoa Joseba Segura gotzainak idatzitakoa da. Bertan dino lan hau “beharrezkoa” dala eta maitasunaren eta esperientziaren eskutik idatzitakoa dala.
Liburuaren sarreran egileak zera eskatzen dau “heriotzaren orduan lagun baten eskua gura dot: nire azken unean joaten itxi deistala baina ez daitela izan behar dana baino lehenago”
