Barriak

Datorren zapatuz, abenduak 14, 19:30etan, Bilboko Gospel koruak kontzertua eskainiko dau Bidesari alkartearen alde, Areetako Andres Isasi entzunaretoan. Ekitaldiaren antolaketaz arduratu dan Areetako Mesedetako Ama parrokiako Kartzela Pastoraltzako taldeak Bidesariri emongo deutso batu daiten dirua, kudeatzen dituan pisuetan erabili daian. Sarrerak (10 euro): hemen eta leihatilan, kontzertua hasi baino ordubete aurretik.

Giza Eskubideen Adierazpen Unibertsalaren 76. urteurrena dala-eta, Gogoan- por una memoria digna taldeak ekitaldi bi antolatu ditu Gernika-Lumon. Gaur -abenduak 10, martitzena-, Kepa Aulestiak berbaldia eskainiko dau, “Una comunidad decente: carencias y retos de la convivencia en Euskadi” bere liburuan (2023) jasotako gogoeten haritik, 18:30etan, Elai-alai aretoan. Beste alde batetik, bihar, Xuban Intxaustik zuzendu dauan eta giza eskubideei buruzko New Yorkeko jaialdirako aukeratu daben 'Gesto' dokumentala proiektatuko da. Emonaldia, Pastoral Barrutiagaz batera antolatu dabe. 

Joan dan domekaz, abenduak 9, Juan Mari Garatea Goicochea abadea hil zan 88 urte ebazala. Bere arimaren aldeko hileta-eleizkizuna bihar -abenduak 11, eguaztena- ospatuko da, 19:00etan, Lekeitioko Andra Mari basilikan. Euskal diasporako alkarte batzuetako kapilau izan zan Ipar Amerikan.

Bilboko Abandoko San Bizente Martiria parrokiak Abendualdiko koroa berezia jarri dau altaran, organo-tutuez eginda, eleizako organoan burutzen diharduen zaharbarritzea gogora ekarteko. Koroa, benetan originala da, bere berariazko sinbolismoa eta eleizaren nortasunean funtsezkoa dan organoa, bere balio historiko eta musikalari eusteko konpontzen diharduena, buztartzen ditu-eta.

Eleizbarrutiko Teologia eta Pastoraltza Institutuak hartu-emonerako ekitaldia antolatu dau, abegiaren eta alkarte inklusibo izatearen inguruko esperientziak batera jarteko. Datorren eguenez, abenduak 12, izango da Barria eraikinean (Plaza Barria 4, 1. solairua, 18:30etan), honako honeekaz: Mertxe Sagastizabal (Eskaut Durango eta San Antonio ikastetxea), Fredy Martinez (Sestao eta ospitaleetako arreta erlijiosoa), Maria Martin (EKO-ACG eta Errekarte PBa), Josu Beaskoetxea (CVX alkarteak eta Alonsotegi) eta Fernando Marcos (Areeta-Romo PBa).

Kurtso honetan, Eleizbarrutiak bere sorreraren 75. urteurrena ospatzen dihardu eta datozan hilabeteetan oroitzapenezko hainbat jarduera ospatuko da, besteak beste, 75 urteko historian izan diran gertaera gogoangarrietako batzuk jasoten dituan panelen erakusketa. Eleizbarruti osoa zeharkatzen diharduen panelok Begoñako basilikan jarri ebezan barikuan eta gura dauanak ikusi leikez. Asteburuan, bainera, Seminarioaren Eguna ospatu da eta Mª Jesus Lorenzo lekaimeari emon deutse 'Barakaldo solidarioa' saria. Ondoren, barri honeen eta beste hainbaten errepasoa. 

Kristau Gazteria Langileak (JOC)  50. Biltzar Nagusia ospatu dau Huescan. Bilboko Eleizbarrutiko 6 militante (bat, sarbidean) eta 3 konbidatu heldu izan dira bertan: Ethan, Ainara, Patricia, Nagore, Eneko, Victor, Nacho, Virginia eta Pepelu.

"Dios camina con su pueblo/Jainkoa herriarekin batera doa" goiburuaren haritik ospatuko da Abendualdiko otoitzaldia, Karidade eta Zuzentasunerako Eleizbarrutiko Ordezkaritzako Migrazinoetarako sailak eta Loiola zentroak antolatuta. Bihar -abenduak 10, martizena- izango da Arrupe Etxean (Aita Lojendio 2. BIlbao), 19:00etatik 21:00etara.

Astean zehar webgunean argitaratutako barri nagusiak laburbilduta eskaintzen deutsuguz. Bizkaiko Eleizan asko dira aurrera eroaten diran ekimenak eta webgunean euron arteko batzuk baino ez dira batzen. Zure parrokian, erakundean zein eleiz alkartean gertatzen danaren barri emoteko helbide honetara idatzi zeinke: komunika@bizkeliza.org

Jaiotzazaleen Bizkaiko Alkarteak jaiotzen kanpainaren 66. ekitaldia aurkeztu dau. Pausoen Museoan, askotariko jaiotzak dagoz; bik Athletic omentzen dabe.