“Haurtzaro solidarioa” dalakoak 4.357 euro batu ditu
Atzo -abenduak 11, domekea- “Haurtzaro solidarioa” bigarren eskuko liburu eta jostailuen azoka ospatu zan Gernikako merkatu-plazan, misinoetarako taldeak antolatuta. Aitatutako azoka horren -eta zozketa baten- bidez batutako dirua ezintasunen bat daben ume eta gaztetxoakaz jarduten dauan Ekuadorreko Los Rioseko heziketa-unitate espezializatura bialduko da, kasu honetan, 4.357 euro.
Malawitik
Lilongweko Don Bosco Youth Technical Instituteko (Lanbide heziketa elektrizitatean eta automobilgintzan),14 ikaslek eta irakasle 2k hilebetea daroe gure Eleizbarrutian, SAAM egitasmoan –Sopuertako San Viator EBI sareko Eleizbarrutiko ikastetxea partaide da- parte hartuz. Sortzez Garbiaren egunez, Santiago katedralean, On Joseba Segura gotzaina buru zala, ospatu zan eukaristian parte hartu eben.
Vida Acendente/Bizian Gora
Vida Ascendente-Bizian Gora mobimentuko Eleizbarrutiko Batzordeak bisita egin eutsan gotzainari orain dala egun batzuk, kurtsoko jardueren egutegia -hileroko heziketa-batzarrak, erretiroak, zaindarien eguna, e.a.- eta taldeen batzarretan lantzen dabezan lagundarriak -“Bizitzako bidea erakutsiko deustazu”- aurkezteko.
A. Romanen agurra San Felicisimo parrokian
Domekaz, Deustuko San Felicisimo parrokian ospatu zan Eukaristian, 23 urtez parroko izan dan A. Roman Elexpuru parrokoari agur egin eutsen eta parrokia talde barriari harrera.
Betiko profesa Jesusen Mirabeak ordenan
Jesusen Mirabeak ordenaren jatorrizko etxean ospatu dau sor Bettyk bere betiko profesa
Nazaretarraren Kofradiaren 75. urteurrena
Jente ugari batu zan zapatuz, Bilboko Asisko San Frantzisko parrokian (Quinta parroquia), Nazaretarraren Kofradiaren 75. urteurreneko ekitaldi nagusian.
