Noticias

Santiago Biderako eta Erromesaldietako Elizbarrutiko sailak ekimena antolatu dau abuztuaren 14rako, Andra Mariaren egunaren bezperarako. Erromes ugari dabil Done Jakue Bidea egiten udan zehar eta atsedenaldia hartzeko eskaintza egiten jake. Arratsaldeko sei ta erdietan, Kurutze Santua eleizan, topaketa bat izango da. Bertan, esperientziak trukatzeaz gain, otoitz egiteko konbitea luzatuko da.  

Isila, irribartsua eta abegikorra zan Johnny. Bere amamaren hiletara joan zan Guayaquilera (Ecuador) ekainean eta ezin izan dau itzuli. Bertako ospitale baten hil da bapatean gaixotu ondoren. Latinamerikako alkartea umezurtz izten dau. Eurekaz ospatzen eban hilero mezea eta taldearen eragile garbia zan. Errekarteko Pastoral Barrutian be jota dagoz albistearen barri izan dabenetik. Beragaz han abade modura dagoan Pakasa Dieu-Mercik dino astegoien honetako meza guztietan gogoan eukiko dala eta irailaren erdialdera ospatuko dala bere aldeko mezea.

Korreosek Ziortzako monastegiko klaustroa atara dau zigilu baten. Done Jakue bidean dagozan toki esanguratsuak balioan ipini gurean, oraingoan Bizkaiko kolegio-eleizaren irudia zabaldu dau. Bertan bizi diran sei fraileek lan ugari daukie aurton ostatura datozan erromesakaz. Pandemia ostean, normaltasuna itzuli dala onartzen dabe. Korreoseko ekimena dala-ta, ezer jakin ez daben arren, pozgarria dala dinoe, Bizkaiko ondare erlijiosoa ezagutzera emoteko modu bat dalako.

Gaur sortzailearen eguna ospatzen dabe domingotarrek. Lekeition 12 ta erdietan eukiko dabe mezea Santo Domingo monastegian eta Elorrion, goizeko hamarretan ospatu dabe eukaristia Iñaki Jauregi parrokoa meza buru zala. Datorren abuztuaren 27an ganera, Elorrion Keniako jatorriko monja bik botoen ospakizuna eukiko dabe on Joseba Segura gotzaina bertan dala.

Gaur arratsaldeko zazpiretan Abandoko San BIzente eleizan ospatuko da José Manuel Guadillaren aldeko hileta elizkizuna. Bilboko gotzaina, on Joseba Segura, izango da meza burua. Guadilla 95 urtegaz hil da Bilbon, bere jaioterrian. Klaretar modura ordenatu zan baina Uruguayn 35 urte misiolari modura egon ondoren abade sekular egin zan. Santoñako (Kantabria) parrokoa izan zan 15 urte ingurutan eta azken urteotan Bilbon zerbitzatu izan dau Txurdinagako monja trinitarioen kapelau modura.

Abuztua argazkiaren hilabetea da. Horren harira, Euskalerriko lehenengo emakume argazkilaria izan zan Eulalia de Abaituaren barri dakargu. Eleiz Artxiboak Alkarren Barri aldizkarian 2022. urte honetan zehar egiten dauan kolaborazinoan aurkitu daiteke informazino zehatzagoa. 

Arratzun eta Busturiako Axpe auzoan, izango dira `Urdaibaiko Organoak´ zikloaren kontzertuak astegoien honetan. Gaur, iluntzeko zortziretan Esther Ballesteros sopranoak eta Jesus Perez, organo joleak eskainiko dabe hilabete honetako lehenengo emonaldia Santo Tomas eleizan. BIhar, ordu berean, Paolo Bougeaten txandea izango da Andra Mariaren tenpluan. Aurton, kontzertuak ez eze, bisita gidatuak be antolatu dabez eratzaileek. 

Gaur iluntzean ipiniko deutsie Begoñako Amatxuri abuztuaren 15erako jazten jakon arropa zuria. Bihar, zapatuz, hasiko dira Amabirjinaren eguneko bederatziurrenak Bizkaiko eleizetan. Ezagunena eta jenterik gehien erakarten dauana Bizkaiko herri guztietatik Begoñakoa izaten da. Izan be, Amatxu da Bizkaiko zaindaria. Aurton, pandemia aurreko sasoietako moduan goizaldeko lauretan ospatuko da lehenengo mezea eta orduro egongo dira mezak 13ak arte goizez. Eguerdiko hamabietan on Joseba Segura gotzaina izango da meza burua. Arratsaldez, bostetatik gaueko bederatziak arte egongo dira mezak. …

Bilboko Elizbarrutiko ordezkariak dagoz parte hartzen aste honetan zehar Salamancan lan duinaren inguruan dagozan hausnarketa ekitaldietan. Berrehun bat lagun alkartu dira barriro, pandemiaren etenaldiaren ostean, Ekintza Katolikoak antolatutako udako ikastaroetan. Jardunaldietan Kerman Lopez, bikario nagusia dago, besteak beste. Gaur 125 urte dira Guillermo Rovirosa HOACeko sortzailea jaio zana. Bere aldeko mezea egongo da eta ondoren, lan duina eskatzeko ekintza publikoa egingo da.

Uztailaren 31 guztietan, Arrietako herritarrek erromesaldia egiten dabe Amabirjineagaz Gaztelugatxeko Donienera. Hauxe da besteak beste, santutegiagaz lotuta dagoan ohituren arteko bat, baina beste ugari be badagoz. Guztiak ezagutzeko aukerea dago ermitearen inguruan jarrita dagozan QR kodeei esker.