Bizkaiko udalerririk zabalenak Suzesoko Ama Birjinaren eguna ospatzen dihardu. Jaiegun honetan, bailarako auzotarrek hildakoak gogoratzen dabez eta euren alde otoitz egin. Hori dala-eta, parrokiak hainbat meza antolatu dau.
Lehenengo Eukaristia goizeko zortzietan ospatu da eta goizeko azkena ordu batean izango da. Arratsaldez, meza bakarra ospatuko da, 19:00etan eta alkatea bertan dala ospatuko dan Meza Nagusia, eguerdiko 12:00etan izango da.
Sangrices auzoko erretaularen zaharbarritzea
Gaur bertan, zaindariaren egunez, Sangrices auzoko San Julian eta Santa Basilisa parrokiako erretaularen zaharbarritzeari ekingo deutse. Diputazinoak ordainduko dau obraren %80a eta gainerakoa parrokiak jarriko dau.
Miguel Angel Esnaola parrokoaren esanetan, inguruko alkarteen helburuetako bat Karrantzako ondare kultural eta erlijioso zabal eta aberatsa berreskuratzea da. Bere esanetan, “horri dagokionez, aurreko kurtsoan, Ahedoko eleizaren barrualdea zaharberritu genduan eta orain, Diputasinoko Kultura Sailaren diru-laguntzari esker, Karrantza eta Lanestosaren artean dagoan auzoan dagoan eleiza honen erretaula konpondu ahal izango dogu”.
Erdi Aroko eleiza
Sangriceseko eleiza 1642an eraiki eben. Zehaztasunez landutako landare-apaingarriak dituan erretaula barrokoak (1670-75) goi-alde osoa hartzen dau eta harrizko hiru altararen gainean dago. Sagrarioa, 80 zentimetroko zabalera eta 70 zentimetroko sakonera dauan laukia da eta salomondar zutabe txiki ederez eta San Pedro eta San Pauloren erliebeez apainduta dago. Kalidade handiko urreztatzea dau. Pipiak asko kaltetu ditu sagrarioa eta erretaula. Bilboko Eleiz Museoko adituen arabera, orain dala 300 urte eraiki ziranetik, ez dau emoten inongo tratamenturik jaso dabenik.
