Noticias

Gaur arratsaldeko zazpiretan Abandoko San BIzente eleizan ospatuko da José Manuel Guadillaren aldeko hileta elizkizuna. Bilboko gotzaina, on Joseba Segura, izango da meza burua. Guadilla 95 urtegaz hil da Bilbon, bere jaioterrian. Klaretar modura ordenatu zan baina Uruguayn 35 urte misiolari modura egon ondoren abade sekular egin zan. Santoñako (Kantabria) parrokoa izan zan 15 urte ingurutan eta azken urteotan Bilbon zerbitzatu izan dau Txurdinagako monja trinitarioen kapelau modura.

Abuztua argazkiaren hilabetea da. Horren harira, Euskalerriko lehenengo emakume argazkilaria izan zan Eulalia de Abaituaren barri dakargu. Eleiz Artxiboak Alkarren Barri aldizkarian 2022. urte honetan zehar egiten dauan kolaborazinoan aurkitu daiteke informazino zehatzagoa. 

Arratzun eta Busturiako Axpe auzoan, izango dira `Urdaibaiko Organoak´ zikloaren kontzertuak astegoien honetan. Gaur, iluntzeko zortziretan Esther Ballesteros sopranoak eta Jesus Perez, organo joleak eskainiko dabe hilabete honetako lehenengo emonaldia Santo Tomas eleizan. BIhar, ordu berean, Paolo Bougeaten txandea izango da Andra Mariaren tenpluan. Aurton, kontzertuak ez eze, bisita gidatuak be antolatu dabez eratzaileek. 

Gaur iluntzean ipiniko deutsie Begoñako Amatxuri abuztuaren 15erako jazten jakon arropa zuria. Bihar, zapatuz, hasiko dira Amabirjinaren eguneko bederatziurrenak Bizkaiko eleizetan. Ezagunena eta jenterik gehien erakarten dauana Bizkaiko herri guztietatik Begoñakoa izaten da. Izan be, Amatxu da Bizkaiko zaindaria. Aurton, pandemia aurreko sasoietako moduan goizaldeko lauretan ospatuko da lehenengo mezea eta orduro egongo dira mezak 13ak arte goizez. Eguerdiko hamabietan on Joseba Segura gotzaina izango da meza burua. Arratsaldez, bostetatik gaueko bederatziak arte egongo dira mezak. …

Bilboko Elizbarrutiko ordezkariak dagoz parte hartzen aste honetan zehar Salamancan lan duinaren inguruan dagozan hausnarketa ekitaldietan. Berrehun bat lagun alkartu dira barriro, pandemiaren etenaldiaren ostean, Ekintza Katolikoak antolatutako udako ikastaroetan. Jardunaldietan Kerman Lopez, bikario nagusia dago, besteak beste. Gaur 125 urte dira Guillermo Rovirosa HOACeko sortzailea jaio zana. Bere aldeko mezea egongo da eta ondoren, lan duina eskatzeko ekintza publikoa egingo da.

Uztailaren 31 guztietan, Arrietako herritarrek erromesaldia egiten dabe Amabirjineagaz Gaztelugatxeko Donienera. Hauxe da besteak beste, santutegiagaz lotuta dagoan ohituren arteko bat, baina beste ugari be badagoz. Guztiak ezagutzeko aukerea dago ermitearen inguruan jarrita dagozan QR kodeei esker.

Aita Santuak hilero kaleratzen dauz otoitz asmoak. Abuztuan enpresari txiki eta ertainen alde errezetako eskatzen dau.

Gaur hasi eta abuztuaren 7ra arte, Santiagon Gazte katolikoen Europako Topaketea egongo da. Hori dala-ta 12.000 bat gazte alkartuko dira apostoluaren sorterrian. Bizkaitik 50 bat gazte abiatu dira bertara talde ezbardinetan banatuta. La Peñako eta San Bizenteko parrokietatik, Deustuko Unibertsitatetik eta Mendialai taldeko ordezkariak egongo dira topaketan parte hartzen. Fran Pinilla abadea be erromesaldia egiten dabil aurreko eguenetik eta atzo heldu zan Santiagora.

Domeka honetan, abuztuak 7 Begoñako Amatxu ibiltariaren itsas prozesinoa egongo da. Orain hiru urte egin zan azkena. Orduan, on Joseba Segura gotzain laguntzaile zala bera joan zan Amabirjinea joian ontzian. Oraingoan, Sergio Buiza I bikaritzako lurralde bikarioa joango da. Begoñako Anaidiak antolatzen dau ekitaldia eta aurton pandemian hil diran guztiak eukiko dira gogoan. Santurtzin goizeko hamaiketan urtengo dau ontziak eta 12:30etan helduko da Bilbora.

Bermeoko XXXVII. Musika Astea atzo hasi zan Santa Maria eleizan. Bariku honetan, abuztuaren 5ean amaituko da. Kontzertu guztiak eleizan izango dira, azken egunekoa izan ezik. Ez da sarrerarik ordaindu beharko baina aurreko urteetan legez, borondatea batuko da alkartasun proiektu baterako. Solive Gobernuz Kanpoko Alkarteak, karmeldarren bitartez aurrera daroazan proiektuetara bideratuko da batzen dan dirua. Jaialdiak ohiko formatua berreskuratu dau, aforoa bete artekoa. Arratsaldeko zortziretan izango dira kontzertuak Santa Maria eleizan. Gaur, Kendra folk taldearen emonaldia izango da.