Barriak

Euskal telebista publikoaren lehenengo kateak (ETB1), Lekeitioko basilikatik emongo ditu mezak datozan lau domekatan goizeko hamarretan. Tenplu honek erretaula nagusi zoragarria dau, Sevilla, Toledo eta Oviedokoakaz batera, Estatuko handienetakoa dana.  Andra Mariaren Zeruratzearen izenpeko dan tenplu honetan, Cavaille Coll organoa dago eta hori joz girotuko dau eleizkizuna Mesus Mari Bollar organistak datorren domekaz, urtarrilak 26, eta otsailaren lehenengo hiru domekatan. Herribilduko kultur ondasunik garrantzitsuenetakoa dan musika-tresna hau barriztatzen dihardue. 

On Joseba Segura Bilboko gotzainak, Iñaki Orbe Hezkuntzarako Bizkaiko ordezkariak eta Jose Maria Gorroño Gernikako alkateak emon deutse hasiera EBI STEAM azokari San Fidel Ikastolan. EBI Elizbarrutiko Ikastetxeak sareko ikastetxeetako 1.000 ikasle inguruk parte hartu dau.

Datorren zapatuz, urtarrilak 25, "baba-jan solidarioaren" ekitaldi barria ospatuko da Abandoko San Bizente Martiria parrokiako Bengo-Leku lokaletan. Jardunaldiari hasiera emoteko, 13:00an pintxo bat hartuko dabe eleizpean eta "alkarteagaz bat egin"; baba-jana etorriko da gero eta bazkalostean jolasak izango dira umeentzat eta hainbat zozketa. 19:30etan, kontzertu solidarioaz gozatzeko aukera izango da eleizan, Coro del Deportivo eta Sanfran korue protagonista dirala (sarrera doan, amaieran, diru-laguntza eskatuko da).

Mariaren Leginoa mobimentuak antolatuta, erretiroa ospatuko da gaur arratsaldeko seietan bere egoitzan (Kapelutegi 12, 1.-ezker, Bilboko Zazpikaleak), militante izan ala ez, parte hartu gura daben guztientzat zabalik. Alfonso Lamberen inguruan hausnartuko dabe eta Hitzaren ospakizuna be egingo da. 

Bake Topaketaren XI. ekitaldia barritasunez beteta dago. Aurton, Eleizbarrutiaren sorreraren 75. urteurrenari eta mundu osoko Eleizak ospatzen diharduan Urte Santuari lotuta ospatuko da. Ekitaldiaren antolaketaz arduratzen dan Bake eta Adiskidetzerako Eleizbarrutiko Batzordeak gertaera biak gogoan hartu gura ditu eta "bizi izandako historiatik ikasi, oroimena egin eta ospatu".. Bake Topaketa Gernikan izango da otsailaren 22an eta zabalik da autobusetarako izena emoteko epea orri honetan. Otsailaren 16a da azken eguna.

Atzo -martitzena- 60 urteko historian, sasoi batean edo bestean, Kongoko Errepublika Demokratikoan egon izan diran misiolari batzuk mahai-inguruan parte hartu eben, Abandoko San Bizente Martiria parrokiako Bengo-Leku lokaletan. Zuzenean jardun eben, euren esperientzia batera jarriz, Trino Alvarezek, Maribe Bengoecheak, Rafa Saezek, Jose Luis Ormijanak, Arturo Gomezek eta Xabier Goikouriak bialdutako idazkia irakurri eben. Ekitaldia, Euskal Eleizbarrutietako Misinoek antolatu eben, Mufungaren Adiskideak eta Goikouria Fundazinoek eta Abandoko San Bizente Martiria parrokiak lagunduta. Saioari …

Otsailaren 8tik 15era ospatuko da UniRaid rallyaren 2025eko ekitaldia. 2.400 kilometro egingo dabez Dakarren, Tangerretik atara ondoren. Otxarkoaga ikastegiko ikasle eta irakasleek parte hartuko dabe aurton be. Marokoko basamortuko inguru isolatuetan bizi diran alkarte eta eskoletara material solidarioa eroatea da lasterketaren helburua. Horretarako, mapaz eta iparrorratzaz baliatuta, 20 urtetik gorako autoan egingo dabe 6 etapatan banatutako ibilbidea. 

Carritas Gernikaldea erakundeak solasaldia antolatu dau; Gernikako San Frantzisko parrokian izango da bihar -urtarrilak 23, eguena-, "Samurtasunaren espiritualtasuna" gaiaren inguruan. Jaione Conde Caritas Bizkaia erakundeko IV. eta V. bikaritzetako koordinatzaileak gidatuko dau saioa. 

Fernikako San Fidel ikastolan ospatuko da EBI Steam Azokaren IV. ekitaldia. Azokan, Elizbarrutiko Ikastetxeak.sareko 18 ikastetxetako ikasleak batuko dira. Zientzia eta artea buztartzen dituan azoka hau eguenez, urtarrilak 23, ospatuko da eta haur hezkuntzatik Batxilergorainoko adin guztietako ikasleek STEAM jakintzagaiei (zientziak, teknologia, iingeniaritza, artea eta matematikak) lotutako ehun egitasmotik gora aurkeztuko dabe.

Datorren eguenez, urtarrilak 23, Serafin Bejar Granadako abade eta teologia-fakultateko irakasleak berbaldia eskainiko dau: "Jesusen jainkotasun eta gizatasuna". Saioa Barrian (Plaza Barria, 4) izango da, 18:30etatik aurrera, Eleizbarrutiko Teologia eta Pastoraltza Institutuak antolatuta.